امام بخش ناسخ

غم نہیں محتسب جو توڑ کے خم
نشہ نے چور کر دیا ہم کو

انشاء اللہ خان انشا

اے مست یہ کیا قہر ہے خشت سر خم سے
کیوں تو نے صراحی کی بھلا چور کی گردن

مصحفی غلام ہمدانی

ہر حرف میں سختی ہے ترے سنگ جفا سے
ڈرتا ہوں نہ پھر شیشۂِ دل چور ہو اے شیخ

جگر مراد آبادی

لگتے ہی ٹھیس ٹوٹ گیا ساز آرزو
ملتے ہی آنکھ شیشۂ دل چور چور تھا
دیکھا تھا کل جگرؔ کو سرِ راہ مے کدہ
اس درجہ پی گیا تھا کہ نشے میں چور تھا

خواجہ میر درد

محتسب آج تو مے خانے میں تیرے ہاتھوں
دل نہ تھا کوئی کہ شیشے کی طرح چور نہ تھا

اختر شیرانی

یہ بے رنگیاں کب تک اے حسن رنگیں
ادھر آ تجھے عشق میں چور کر دوں

شکیل بدایونی

نذر نگاہِ ناز ہیں دل کی نزاکتیں
شیشے کو چور چور کیے جا رہا ہوں میں

شاذ تمکنت

ہزار جان سے ہم ایک ہیں یہ سچ ہے شاذؔ
رواج و رسم کا لیکن دلوں میں چور بھی ہے
نفس نفس ہے ترے غم سے چور چور اب تک
نہ شام ہے نہ سویرا قریب دور اب تک

مجروح سلطان پوری

وہ کون سی صبحیں ہیں جن میں بیدار نہیں افسوں تیرا
وہ کون سی کالی راتیں ہیں جو میرے نشے میں چور نہیں