انشاء اللہ خان انشا

بیٹھے بیٹھے کہیں بلبل کو جو چھیڑا میں نے
تو نسیم اس کی بدل ہو کے کھڑی مجھ سے لڑی

داغ دہلوی

قیامت میں قیامت کر گیا کون
کہ دل تھامے صف محشر کھڑی ہے

بیان میرٹھی

چمن میں سرو کا بہروپ بھر کر
قیامت منتظر کس کی کھڑی ہے
سرہانے مدعی آیا تو جانا
جدائی کی گھڑی سر پر کھڑی ہے

احمد راہی

جس طرف جائیں جہاں جائیں بھری دنیا میں
راستہ روکے تری یاد کھڑی ہوتی ہے

سیف الدین سیف

قریب موت کھڑی ہے ذرا ٹھہر جاؤ
قضا سے آنکھ لڑی ہے ذرا ٹھہر جاؤ

احمد فراز

اپنے ہی سائے سے ہر گام لرز جاتا ہوں
راستے میں کوئی دیوار کھڑی ہو جیسے

قابل اجمیری

ہونٹوں پہ ہنسی آنکھ میں تاروں کی لڑی ہے
وحشت بڑے دلچسپ دوراہے پہ کھڑی ہے

نوح ناروی

تلوار لیے وہ نہیں مقتل میں کھڑے ہیں
اس وقت مرے آگے مری موت کھڑی ہے