انشاء اللہ خان انشا

شعلے آہوں کے بدن اپنے سے ہیں یوں ہی نمود
منعکس جیسے ہو سورج کی کرن آئینے میں

عرفان صدیقی

یہ راز کھلا روزنِ زنداں کی بدولت
سورج میں ہے جو بات کرن میں بھی وہی ہے

مجید امجد

جب اک چراغِ راہگزر کی کرن پڑے
ہونٹوں کی لو لطیف حجابوں سے چھن پڑے

ادا جعفری

آنکھوں میں روپ صبح کی پہلی کرن سا ہے
احوال جی کا زلفِ شکن در شکن سا ہے

عبید اللہ علیم

گزر گئے تو گزرتے رہے بہت خورشید
جو رنگ لائی تو لائی ہے اک کرن کیا کیا

رسا چغتائی

چراغ صبح سے شام وطن کی بات کرو
جو راہ میں ہے ابھی اس کرن کی بات کرو

شاذ تمکنت

کوئی آس ہے نہ ہراس ہے شب ماہ کتنی اداس ہے
وہ جو رنگ رنگ کے عکس تھے وہ کرن کرن سے چلے گئے

فراق گورکھپوری

نگہِ ناز میں یہ پچھلے پہر رنگ خمار
نیند میں ڈوبی ہوئی چندر کرن کیا کہنا
دل کے آئینے میں اس طرح اترتی ہے نگاہ
جیسے پانی میں لچک جائے کرن کیا کہنا
نیلگوں شبنمی کپڑوں میں بدن کی یہ جوت
جیسے چھنتی ہو ستاروں کی کرن کیا کہنا

محسن نقوی

اب کیوں نہ سجاؤں میں تجھے دیدہ و دل میں
لگتا ہے اندھیرے میں سویرے کی کرن تو
نہ پوچھ پہلی ملاقات میں مزاج اس کا
وہ رنگ رنگ میں سمٹا کرن کرن میں کھلا

ناصر کاظمی

اندھیر ہے کہ جلوۂ جاناں کے باوجود
کوچے نظر کے ایک کرن کو ترس گئے
پھر وہی دشتِ بے اماں پھر وہی رنجِ رائگاں
دل کو جگا کے سو گئی تیرے خیال کی کرن
ہوائے ظلم یہی ہے تو دیکھنا اک دن
زمین پانی کو سورج کرن کو ترسے گا