انشاء اللہ خان انشا

بعید شان سے عاشق کے آہ بھرنی تھی
ولی وہ کیا کرے جب اس کی جان ہی نکلے

داغ دہلوی

شبِ وصل لیں ان کی اتنی بلائیں
کہ ہمدم مرے ہاتھ ہی جانتے ہیں
کیا ہے وعدۂِ فردا انہوں نے دیکھیے کیا ہو
یہاں صبر و تحمل آج ہی سے ہو نہیں سکتا

مومن خان مومن

ہم سے نہ بولو تم اسے کیا کہتے ہیں بھلا
انصاف کیجے پوچھتے ہیں آپ ہی سے ہم

باقی صدیقی

ہر تمنا ہے دور کی آواز
مر مٹے دور دور ہی سے ہم
کیسے انسان، کس کی آزادی
سر پہ الزام ہی لیا ہم نے

جون ایلیا

حالت حال کے سبب حالت حال ہی گئی
شوق میں کچھ نہیں گیا شوق کی زندگی گئی
ہو کبھی تو شراب وصل نصیب
پیے جاؤں میں خون ہی کب تک
میرؔ جونی ذرا بتائیں تو
خود میں ٹھہریں گے آپ ہی کب تک
تھی جو کبھی سر سخن میری وہ خامشی گئی
ہائے کہن‌ سنن کی بات ہائے وہ بات ہی گئی
نہ کثدم ہیں نہ افعی ہیں نہ اژدر
ملیں گے شہر میں انسان ہی کیا
ضبط کر کے ہنسی کو بھول گیا
میں تو اس زخم ہی کو بھول گیا
صبح تک وجہ جاں کنی تھی جو بات
میں اسے شام ہی کو بھول گیا
عیش امید ہی سے خطرہ ہے
دل کو اب دل دہی سے خطرہ ہے
جس کے آغوش کا ہوں دیوانہ
اس کے آغوش ہی سے خطرہ ہے
جونؔ ہی تو ہے جونؔ کے درپئے
میرؔ کو میرؔ ہی سے خطرہ ہے
اس طور سے ہوا تھا جدا اپنی جان سے
جیسے بھلا سکوں گا اسے آج ہی سے میں

جگر مراد آبادی

ترے جمال حقیقت کی تاب ہی نہ ہوئی
ہزار بار نگہ کی مگر کبھی نہ ہوئی
صبا یہ ان سے ہمارا پیام کہہ دینا
گئے ہو جب سے یہاں صبح و شام ہی نہ ہوئی

قمر جلالوی

آئینہ دیکھنے والے یہ خبر ہے تجھ کو
کبھی انسان پہ اپنی ہی نظر ہوتی ہے

احسان دانش

دیکھ کے خشک و زرد پھول دل ہے کچھ اس طرح ملول
جیسے مری خزاں کے بعد دور بہار ہی نہیں
دل کی رغبت ہے جب آپ ہی کی طرف
کس لیے آنکھ اٹھتی کسی کی طرف
کون سا جرم ہے کیا ستم ہو گیا
آنکھ اگر اٹھ گئی آپ ہی کی طرف

ادا جعفری

اجنبی شہر کی گلیوں میں اداؔ
دل کہاں لوگ ہی ملتے ہوں گے

ضیا جالندھری

تیرا غم بھی نہ ہو تو کیا جینا
کچھ تسلی ہے درد ہی سے مجھے

عبید اللہ علیم

میں جس میں کھو گیا ہوں مرا خواب ہی تو ہے
یک دو نفس نمود سہی زندگی تو ہے

علی سردار جعفری

پھانسیاں اگتی رہیں زنداں ابھرتے ہی رہے
چند دیوانے جنوں کے زمزمے گاتے رہے

اختر امام رضوی

میں اپنے کرب میں غلطاں وہ اپنے کیف میں گم
ہے اس کی جیت بھی میری شکست ہی کی طرح

شان الحق حقی

کچھ ایسا محو ہے اسباب رنج و عیش میں دل
کہ عیش و رنج کی پہچان ہی نہیں آتی

احمد فراز

عشق آغاز ہی سے مشکل ہے
صبر کرنا ابھی سے مشکل ہے

امیر مینائی

جو کی میں نے جوبن کی تعریف بولے
تمہیں اپنے مطلب کی ہی سوجھتی ہے

شاذ تمکنت

طرب کی بزم میں کم کم فسردگی اے شاذؔ
کہیں مزاج کی افتاد ہی نہ بن جائے

فراق گورکھپوری

نئے منصور ہیں صدیوں پرانے شیخ و قاضی ہیں
نہ فتوے کفر کے بدلے نہ عذر دار ہی بدلا

کیف بھوپالی

لکھتا ہے غم کی بات مسرت کے موڈ میں
مخصوص ہے یہ طرز فقط کیفؔ ہی کے ساتھ

ناصر کاظمی

جرمِ انکار کی سزا ہی دے
میرے حق میں بھی کچھ سنا ہی دے
تو نے بنجر زمیں کو پھول دیے
مجھ کو اک زخمِ دل کشا ہی دے
عمر بھر کی نواگری کا صلہ
اے خدا کوئی ہم نوا ہی دے
خبر نہیں وہ مرے ہم سفر کہاں پہنچے
کہ رہگزر تو مرے ساتھ ہی پلٹ آئی

نوح ناروی

ہم وفا کی امید کیا رکھیں
کس میں ہو گی جو آپ ہی میں نہیں
کس سے پوچھوں کہ رات کیا گزری
اہلِ بزم اپنے ہوش ہی میں نہیں
کوئی چلمن اٹھائے بیٹھا ہے
کوئی اپنے حواس ہی میں نہیں