مرزا غالب

کم نہیں نازش ہمنامی چشمِ خوباں
تیرا بیمار، برا کیا ہے ؟ گر اچھا نہ ہوا
آئے ہو کل اور آج ہی کہتے ہو کہ ’جاؤں؟‘
مانا کہ ھمیشہ نہیں اچھا کوئی دن اور
یہ باعث نومیدی اربابِ ہوس ہے
غالب کو برا کہتے ہو ، اچھا نہیں کرتے
ہم پیشہ و ہم مشرب و ہم راز ہے میرا
غالب کو برا کیوں کہو اچھا مرے آگے
غافل ، ان مہ طلعتوں کے واسطے
چاہنے والا بھی اچھا چاہیے

مصطفٰیٰ خان شیفتہ

چشمِ عنایت سے بچی جاں مجھے
نرگسِ بیمار نے اچھا کیا

مومن خان مومن

غیر عیادت سے برا مانتے
قتل کیا آن کے اچھا کیا
بیمار اجل چارہ کو گر حضرت عیسیٰ
اچھا بھی کریں گے تو کچھ اچھا نہ کریں گے

باقی صدیقی

تو عرضِ تمنا کو بھی جھگڑا کہہ دے
ہے بات یہی دل میں تو اچھا کہہ دے
یہ سوچ کے ہر بات میں کہہ دیتا ہوں
شاید تو کبھی بھول کے اچھا کہہ دے

جون ایلیا

جان لیوا تھیں خواہشیں ورنہ
وصل سے انتظار اچھا تھا
ایسا ہے کہ سینے میں سلگتی ہیں خراشیں
اب سانس بھی ہم لیں گے تو اچھا نہ کریں گے
یاراں وہ جو ہے میرا مسیحائے جان و دل
بے حد عزیز ہے مجھے اچھا کیے بغیر

رئیس فروغؔ

میرے اندازے کی نسبت وہ چراغ
کم جلا تھا پھر بھی اچھا جل گیا

اسرار الحق مجاز

چارہ گری سر آنکھوں پر اس چارہ گری سے کیا ہو گا
درد کہ اپنی آپ دوا ہے تم سے کیا اچھا ہو گا

زہرا نگاہ

عورت کے خدا دو ہیں حقیقی و مجازی
پر اس کے لیے کوئی بھی اچھا نہیں ہوتا
اپنا ہر انداز آنکھوں کو تر و تازہ لگا
کتنے دن کے بعد مجھ کو آئینہ اچھا لگا

ظہیر کاشمیری

اچھا تھا کہ جب عارضۂ ہجر نہیں تھا
اچھا ہے کہ اب تم کبھی اچھا نہ کرو گے

تلوک چند محروم

محرومؔ شاعروں میں بہت نام ور نہیں
اتنا ضرور ہے کہ سب اچھا کہیں جسے

جلیل مانک پوری

مجھ کو دیکھو اور میری آرزو
اک حسیں اچھے سے اچھا چاہیے

حسرت موہانی

مداوائے دلِ دیوانہ کرتے
یہ کرتے ہم تو کچھ اچھا نہ کرتے

رسا چغتائی

ممکن ہے وہ دن آئے کہ دنیا مجھے سمجھے
لازم نہیں ہر شخص ہی اچھا مجھے سمجھے

سلام مچھلی شہری

بجھ گئی کچھ اس طرح شمع سلامؔ
جیسے اک بیمار اچھا ہو گیا

فانی بدایونی

اے اجل اے جان فانیؔ تو نے یہ کیا کر دیا
مار ڈالا مرنے والے کو کہ اچھا کر دیا
خود مسیحا خود ہی قاتل ہیں تو وہ بھی کیا کریں
زخم پیدا کریں یا زخمِ دل اچھا کریں
تم دو گھڑی کو آئے نہ بیمار کے قریب
بیمار دو گھڑی کو بھی اچھا نہیں رہا
وہ درد دے کہ موت بھی جس کی دوا نہ ہو
اس دل کو موت دے جسے اچھا کرے کوئی
نہیں منظور تپ ہجر کا رسوا ہونا
تیرے بیمار کا اچھا نہیں اچھا ہونا
دل لے کے یہ کیا ضد ہے کہ اب جان بھی کیوں ہو
یہ بھی نہ رہے گی بہت اچھا نہ رہے گی

فراق گورکھپوری

منہ سے ہم اپنے برا تو نہیں کہتے کہ فراقؔ
ہے ترا دوست مگر آدمی اچھا بھی نہیں
ہم جدائی سے بھی کچھ کام تو لے ہی لیں گے
بے نیازانہ تعلق ہی چھٹا اچھا ہے

کلیم عاجز

مت برا اس کو کہو گرچہ وہ اچھا بھی نہیں
وہ نہ ہوتا تو غزل میں کبھی کہتا بھی نہیں
شاعری جیسی ہو عاجزؔ کی بھلی ہو کہ بری
آدمی اچھا ہے لیکن بہت اچھا بھی نہیں
انہیں فریاد نازیبا لگے ہے
ستم کرتے بہت اچھا لگے ہے
اٹھا آگے سے ساقی جام و مینا
دل اچھا ہو تو سب اچھا لگے ہے

ناصر کاظمی

نہ کر خیالِ تلافی کہ میرا زخمِ وفا
وہ زخم ہے جسے اچھا نہ کر سکے تو بھی

نوح ناروی

اگر اس کا مرا جھگڑا یہیں طے ہو تو اچھا ہو
خدا جانے خدا کے سامنے کل کیا نہ ہو کیا ہو
وہ ہر دم کی عیادت سے مری گھبرا کے کہتے ہیں
غضب میں جان ہے اپنی نہ مر جائے نہ اچھا ہو