انشاء اللہ خان انشا

دھوم اتنی ترے دیوانے مچا سکتے ہیں
کہ ابھی عرش کو چاہیں تو ہلا سکتے ہیں

حیدر علی آتش

پہنچے تڑپ تڑپ کے بھی جلاد تک نہ ہم
طاقت سے ہاتھ پاؤں زیادہ ہلا چکے

باقی صدیقی

یوں بھی ہونے کا پتا دیتے ہیں
اپنی زنجیر ہلا دیتے ہیں

عبدالحمید عدم

یہ کیسی سرگوشی ازل سازِ دل کے پردے ہلا رہی ہے
مری سماعت کھنک رہی ہے کہ تیری آواز آ رہی ہے

قمر جلالوی

ایسی بھی کیا جفائیں برہم ہو نظمِ الفت
تو نے تو فقرِ دل کی بنیاد ہی ہلا دی
شبِ ہجر بات جب ہے کہ قمر کو وہ نالے
کوئی توڑ دے ستارے کوئی آسماں ہلا دے

احمد راہی

دل افسردہ کا ہر گوشہ چھنک اٹھتا ہے
ذہن جب یادوں کی زنجیر ہلا دیتا ہے

ماجد صدیقی

سزا سناؤ تو اس جرم زیست کی مجھ کو
صلیب درد کی بنیاد تک ہلا دوں گا

جوش ملیح آبادی

دیر صبح بہار کی زنجیر
رنگ رخ سے ہلا رہا ہے یہ کون
سوز پنہاں میں ڈھال کر مکھڑا
ساز میرے ہلا رہا ہے یہ کون

حفیظ جالندھری

رونق بزم بن گئے لب پہ حکایتیں رہیں
دل میں شکایتیں رہیں لب نہ مگر ہلا سکے

افضل منہاس

نغموں کے تعاقب میں نہ جاؤٔ کہ ابھی تک
انساں کو میسر ہی نہیں ہونٹ ہلانے

امیر مینائی

ایک نالے میں جہاں کو تہہ و بال کر دوں
کچھ تیرا دل یہ نہیں ہے کہ ہلا بھی نہ سکوں

فراق گورکھپوری

اف یہ زمیں کی گردشیں آہ یہ غم کی ٹھوکریں
یہ بھی تو بختِ خفتہ کے شانے ہلا کے رہ گئیں

قتیل شفائی

رات یوں چاند کو دیکھا ہے ندی میں رقصاں
جیسے جھومر ترے ماتھے پہ ہلا کرتا ہے

کلیم عاجز

بلاتے کیوں ہو عاجزؔ کو بلانا کیا مزا دے ہے
غزل کم بخت کچھ ایسی پڑھے ہے دل ہلا دے ہے

ناصر کاظمی

فاختہ چپ ہے بڑی دیر سے کیوں
سرو کی شاخ ہلا کر دیکھو
کیوں ٹھہر جاتے ہیں دریا سرِ شام
روح کے تار ہلا غور سے سن
پہلے اک روزنِ در توڑا تھا
اب کے بنیاد ہلا دی ہم نے
مری خموش نگاہوں کو چشمِ کم سے نہ دیکھ
میں رو پڑا تو دلوں کے طبق ہلا دوں گا