مرزا غالب

زخم گر دب گیا، لہو نہ تھما
کام گر رک گیا، روا نہ ہوا
رہزنی ہے کہ دل ستانی ہے ؟
لے کے دل، دلستاں روانہ ہوا
کون ہے جو نہیں ہے حاجت مند
کس کی حاجت روا کرے کوئی

مصطفٰیٰ خان شیفتہ

کھولے گرہِ دل کو ترا ناخنِ شمشیر
یہ کام اجل سے بھی روا ہو نہیں سکتا

میر مہدی مجروح

یاں تو مطلب ہی کچھ نہیں رکھتے
جو کسی سے کہیں روا کیجے

باقی صدیقی

ہم ہیں جو روا نہیں لیکن
تم کہو جو وہی روا ہو جائے
ہم تو ہر دور کے مسافر ہیں
ظلم ہم پر روا تھا پہلے بھی

مجید امجد

اور اب یہ کہتا ہوں، یہ جرم تو روا رکھتا
میں عمر اپنے لیے بھی تو کچھ بچا رکھتا

الطاف حسین حالی

نفس میں جو ناروا خواہش ہوئی پیدا کبھی
اس کو حیلے دل سے گھڑ گھڑ کر روا کرتا رہا
وصل جاناں محال ٹھہرایا
قتل عاشق روا کیا تو نے

احسان دانش

اگر محبت کے مدعی ہو تو یہ رویہ روا نہیں ہے
جو شکوہ ہے روبرو نہیں ہے جو بات ہے برملا نہیں ہے

ادا جعفری

جس در سے دل کو ذوق عبادت عطا ہوا
اس آستان شوق پہ سجدہ روا نہ تھا
جلتے رہے خیال برستی رہی گھٹا
ہاں ناز آ گہی تجھے کیا کچھ روا نہ تھا

فارغ بخاری

ہم سے انساں کی خجالت نہیں دیکھی جاتی
کم سوادوں کا بھرم ہم نے روا رکھا ہے

ثروت حسین

کوئی اقلیم نہیں میرے تصرف میں مگر
مجھ کو آتا ہے بہت فرماں روا ہو جانا

حسرت موہانی

رکھیے نہ مجھ پہ ترکِ محبت کی تہمتیں
جس کا خیال تک بھی نہیں ہے روا مجھے
کشور عشق میں دنیا سے نرالا ہے رواج
کام جو بن نہ پڑیں یاں وہ روا ہوتے ہیں

خاطر غزنوی

غزنوی تو بت شکن ٹھہرا مگر خاطرؔ یہ کیا
تیرے مسلک میں اسے سجدہ روا کیسے ہوا

ناصر کاظمی

اشارہ کرے جو نئی زندگی کا
ہم اس خودکشی کو روا جانتے ہیں