حیدر علی آتش

گل ٹوٹتے ہیں ہوتے ہیں بلبل اسیرِ دام
صیاد مستعد مدد باغباں میں ہے
چمن کی سیر پر ہوتا ہے جھگڑا
کمر میری ہے دست باغباں ہے
بہار گلستاں کی ہے آمد آمد
خوشی پھرتے ہیں باغباں کیسے کیسے
چمن میں رہنے دے کون آشیاں نہیں معلوم
نہال کس کو کرے باغباں نہیں معلوم

مصحفی غلام ہمدانی

آبیار سخن ہے اپنی زباں
لفظ و معنی کے باغباں ہیں ہم
بلبلو باغباں کو کیوں چھیڑا
تم نے ساز فغاں کو کیوں چھیڑا
حسرت ہے کہ یوں لٹے چمن اور
گل ہم کو نہ دیوے باغباں ایک
چمن میں کس کے آنے کی خبر ہے
کرے ہے پھول چن چن باغباں جمع
قسمت اک شب لے گئی مجھ کو جو باغ وصل میں
دیکھتا کیا ہوں کہ اس کا باغباں کوئی نہیں

مصطفٰیٰ خان شیفتہ

ہوئی بیتابی بلبل مؤثر
کہ گھبرایا ہوا کچھ باغباں ہے

یگانہ چنگیزی

زمانہ پھر گیا چلنے لگی ہوا الٹی
چمن کو آگ لگا کر جو باغباں نکلا

باقی صدیقی

فصلِ بہار میں جو نکالے گئے ندیم
ان کی بلا سے باغ جلے ، باغباں جلے
پھول ہیں اس کے باغ ہے اس کا
دسترس جس کی باغباں تک ہے

قمر جلالوی

شعلے نظر نہ آئے یہ کہنے کی بات ہے
اتنا تو آشیانہ تھا باغباں سے دور
پھول سب اچھی طرح تھے باغباں اچھی طرح
میرے آنے تک تھا سارا گلستاں اچھی طرح
صبح کو آئی تھی گلشن میں دبے پاؤں نسیم
دیکھ لے نا غنچہ و گل باغباں اچھی طرح
ہوا کسی کی بھی اے باغباں نہیں رہتی
تری بہار تو کیا ہے خزاں نہیں رہتی
اگر زندہ رہیں تو آئیں گے اے باغباں پھر بھی
اسی گلشن اسی ڈالی پہ ہو گا آشیاں پھر بھی

امیر مینائی

بلبل کو بھی ہے پھولوں کی گلچیں کو بھی طلب
حیران باغباں ہے کسے دوں کسے نہ دوں