حیدر علی آتش

شبِ وصل تھی چاندنی کا سماں تھا
بغل میں صنم تھا خدا مہرباں تھا

باقی صدیقی

ہر کام ادھورا تری نیم نگاہی کا سماں ہے
ہر سمت تری نیم نگاہی کا سماں ہے
سائے کرنوں کے ساتھ چلتے ہیں
صبح میں شام کا سماں دیکھو
تیری قدرت سے ہے جسے انکار
اٹھکے وہ صبح کا سماں دیکھے

جون ایلیا

اب جس کی دید کا ہے سودا ہمارے سر میں
وہ اپنی ہی نظر میں اپنا ہی اک سماں تھا

جگر مراد آبادی

بھری بہار میں تاراجی چمن مت پوچھ
خدا کرے نہ پھر آنکھوں سے وہ سماں گزرے

عرفان صدیقی

ہر طرف ڈوبتے سورج کا سماں دیکھئے گا
اک ذرا منظرِ غرقابی جاں دیکھئے گا
پھول چہروں پہ سویروں کا سماں جیسا ہے
سارا منظر مرے خوابوں کے جہاں جیسا ہے

رئیس فروغؔ

تم بھی بادل سے نظر آتے ہو
آج کی شام سماں ایسا ہے

اختر شیرانی

نہ تمہارا حسن جواں رہا نہ ہمارا عشق جواں رہا
نہ وہ تم رہے نہ وہ ہم رہے جو رہا تو غم کا سماں رہا
نہ وہ باغ ہیں نہ گھٹائیں ہیں نہ وہ پھول ہیں نہ فضائیں ہیں
نہ وہ نکہتیں نہ ہوائیں ہیں نہ وہ بے خودی کا سماں رہا
نہ چمن ہے وہ نہ بہار ہے نہ وہ بلبلیں نہ ہزار ہے
یہی چار سمت پکار ہے نہ وہ رت ہے اب نہ سماں رہا

اسرار الحق مجاز

حسن ہی حسن ہے جس سمت بھی اٹھتی ہے نظر
کتنا پر کیف یہ منظر یہ سماں ہے ساقی

ماجد صدیقی

درد کی آخری حد چھو کے میں کیوں گھبراؤں
رات ڈھلتی ہے تو کچھ اور سماں ہوتا ہے
نہ کسی غم کا چراغاں نہ کسی یاد کے دیپ
کب سے ماجدؔ ہے اندھیروں کا سماں آنکھوں میں

ثروت حسین

چہرۂ بلقیس پر آنکھ ٹھہرتی نہیں
صبح یمن کا سماں خوب ہے اپنی جگہ

جوش ملیح آبادی

کیوں ہماری زمین پر ہر آن
کربلا کا سماں ہے کیا معلوم

خاطر غزنوی

اک جہانگیر خموشی کی رجز خوانی ہے
ہو گیا کیا یہ مرے گھر کا سماں راتوں رات

شان الحق حقی

نغمہ‌‌ و رقص ہوئی جاتی ہے ہر موجِ خیال
چاندنی رات میں دریا کا سماں ہو جیسے

شکیل بدایونی

بیگانہ ہو کے بزمِ جہاں دیکھتا ہوں میں
دنیا کے رنگ و بو کا سماں دیکھتا ہوں میں
ہم ان کی انجمن کا سماں بن کے رہ گئے
سر تا قدم نگاہ و زباں بن کے رہ گئے

احمد فراز

وہ سرِ شام، سمندر کا کنارا، ترا ساتھ
اب تو لگتا ہے کہ جیسے یہ سماں خواب میں تھا
سکوتِ شام خزاں ہے قریب آ جاؤ
بڑا اداس سماں ہے قریب آ جاؤ

فراق گورکھپوری

ظلمت و نور میں کچھ بھی نہ محبت کو ملا
آج تک ایک دھندلکے کا سماں ہے کہ جو تھا
پھر سر‌ میکدۂ عشق ہے اک بارش نور
چھلکے جاموں سے چراغاں کا سماں ہے کہ جو تھا
اک کیفیت راز ہے غم ہے نہ مسرت
اس بزم محبت میں سماں اور ہی کچھ ہے

ناصر کاظمی

در و دیوار ویراں شمع مدھم
شبِ غم کا سماں دیکھا نہ جائے
خاک بھی اڑ رہی ہے رستوں میں
آمدِ صبح کا سماں بھی ہے
ہم نے آباد کیا ملکِ سخن
کیسا سنسان سماں تھا پہلے