حیدر علی آتش

شمعوں کو تو نے دل سے پروانوں کے اتارا
آنکھوں سے بلبلوں کی گلشن گرا دیے ہیں

مصحفی غلام ہمدانی

زاہد جو ہوا کر کے وضو حوض پہ قائم
اک رند کو سوجھی کہ تو اب اس کو گرا بھاگ

مومن خان مومن

مجھ خانماں خراب کا لکھا کہ جان کر
وہ نامہ غیر کا مرے گھر میں گرا گیا

باقی صدیقی

تیری شہرت کے واسطے کیا
خود پہ پردے گرا رہا ہوں
ایک دیوار اٹھانے کے لیے
ایک دیوار گرا دیتے ہیں
ہر سہارا پہاڑ کی صورت
اپنے سر پر گرا تھا پہلے بھی

خواجہ میر درد

دل بھی اے دردؔ قطرۂ خوں تھا
آنسوؤں میں کہیں گرا ہو گا

قمر جلالوی

نشیمن ہو نہ ہو یہ تو فلک کا مشغلہ ٹھہرا
کہ دو تنکے جہاں پر دیکھنا بجلی گرا دینا
صبحِ فرقت بھی قمر آنکھ کے آنسو رکے
یہ وہ تارے ہیں جو دن میں بھی گرا کرتے ہیں

عرفان صدیقی

جسم کو جسم سے ملنے نہیں دیتی کمبخت
اب تکلف کی یہ دیوار گراکر دیکھیں
روح کو روح سے ملنے نہیں دیتا ہے بدن
خیر‘ یہ بیچ کی دیوار گرا چاہتی ہے

رئیس فروغؔ

ماتھے پہ جو زخموں سے دوراہا سا بنا ہے
یہ آدمی احساس کی سائیکل سے گرا ہے
پھول زمین پر گرا پھر مجھے نیند آ گئی
دور کسی نے کچھ کہا پھر مجھے نیند آ گئی

اختر شیرانی

شبِ فرقت پہ مری ہنستے ہیں اے خندۂ نور
میرے قدموں پہ ستاروں کو گرا دے آ کر

بشیر بدر

بچھی تھیں ہر طرف آنکھیں ہی آنکھیں
کوئی آنسو گرا تھا یاد ہوگا

ظہیر کاشمیری

کتنا دل کش ہے تری یاد کا پالا ہوا اشک
سینۂ خاک پہ مہتاب گرا ہو جیسے

جلیل مانک پوری

ملوں گا خاک میں آنسو کی طرح یاد رہے
ملو نہ آنکھ کہیں آنکھ سے گرا کے مجھے

جوش ملیح آبادی

روئے نا شستہ کے دھندلکے میں
رس کی بوندیں گرا رہا ہے یہ کون

رسا چغتائی

نہیں کچھ دوش اس میں آسماں کا
میں خود ہی اپنی نظروں سے گرا ہوں

شاد عظیم آبادی

کہاں یہ تاب کہ چکھ چکھ کے یا گرا کے پیوں
ملے بھرا ہوا ساغر تو ڈگڈگا کے پیوں

عزیز حامد مدنی

عجب تماشۂ صحرا ہے چاک محمل پر
غبار قیس ہے پردہ کوئی گرا جاتا

فانی بدایونی

اب کے ادائے خاص سے کر امتحان دل
جو برقِ طور پر نہ گری ہو گرا کے دیکھ

افضل منہاس

شہرِ نا پرساں کے منظر نقش کر لے ذہن میں
آنکھ رستے میں کوئی منظر گرا بھی آئے گی

کیف بھوپالی

ہائے یہ ان کا طرز محبت
آنکھ سے بس اک بوند گرا دی

محسن نقوی

وہ آج بھی صدیوں کی مسافت پہ کھڑا ہے
ڈھونڈا تھا جسے وقت کی دیوار گرا کر

ناصر کاظمی

کیا خبر کوئی دفینہ مل جائے
کوئی دیوار گرا کر دیکھو
نہر کیوں سو گئی چلتے چلتے
کوئی پتھر ہی گرا کر دیکھو