حیدر علی آتش

کیا ہے زار یہ تیری کمر کے سودے نے
پڑا جو عکس مرا آئینہ میں بال ہوا
شانہ بنیں گے بعد فنا اپنے استخواں
عقدہ کھلے گا گیسوؤں کے بال بال کا
کس عقدے کو اس زلف کی کھولا نہیں ہم نے
سلجھایا ہے الجھا ہوا جو بال ہوا ہے

مصحفی غلام ہمدانی

مت زلف کو شانہ کر مرا جی
وابستہ ہے بال بال کے ساتھ
فکر میں موئے کمر کی ترے حیران رہے
وہی دقاق جو کھینچے ہے سدا بال کی کھال
طول کھینچا بیان نک سک نے
میں لکھا اس کے بال بال کا شعر
جمنا میں کل نہا کر جب اس نے بال باندھے
ہم نے بھی اپنے دل میں کیا کیا خیال باندھے
ہم کس طرح سے دیکھیں جب دے دے پیچ لڑ کے
چیرے کے پیچوں میں تو زلفوں کے بال باندھے
بلبل کا زیر بال نہ بے جا سمجھ تو ہے
اس کے مطالعے میں پر و بال کی کتاب

مصطفٰیٰ خان شیفتہ

اہلِ طریق کی بھی روش سب سے ہے الگ
جتنا زیادہ شغل زیادہ فراغ بال

مرزا رفیع سودا

جب یار نے اٹھا کر زلفوں کے بال باندھے
تب میں نے اپنے دل میں لاکھوں خیال باندھے
تیرے ہی سامنے کچھ بہکے ہے میرا نالہ
ورنہ نشانے ہم نے مارے ہیں بال باندھے
کب دل شکست گاں سے کر عرضِ حال آیا
ہے بے صدا وہ چینی جس میں کہ بال آیا

غلام محمد قاصر

سوتے ہیں وہ آئینہ لے کر خوابوں میں بال بناتے ہیں
سادہ سے پرندے کی خاطر کیا ریشمی جال بناتے ہیں

تلوک چند محروم

دل اسیر بلائے زلفِ دراز
محوِ فریاد بال بال اپنا
تمام عمر پریشاں رکھا دمِ آخر
بلا سے میری پریشاں وہ بال کر بیٹھے

احمد فراز

ہر چہرہ دو ٹکڑوں میں تقسیم ہوا
اب کے دلوں میں ایسا بال پڑا لوگو
اس منظر سادہ میں کئی جال بندھے تھے
جب اس کا گریبان کھلا بال بندھے تھے
صیاد کو پھر بھی مری پرواز کا ڈر تھا
میں گرچہ قفس میں تھا پر و بال بندھے تھے

قتیل شفائی

چاندی جیسا رنگ ہے تیرا سونے جیسے بال
اک تو ہی دھنوان ہے گوری باقی سب کنگال