حیدر علی آتش

مست مجھ سا بھی کوئی نشہ کا ہو گا نہ حریص
پی کے مے جام کے دانتوں سے کنارے توڑے
لاش وحشت سے نہیں پہونچا میں صحرا تک ہنوز
جانے والے گور کے پہنچے کنارے شہر سے

باقی صدیقی

ہم نے جب پتوار سنبھالے
ابھرے طوفانوں سے کنارے
موج وحشت نے سفینے کو ٹھہرنے نہ دیا
راہ آئے ہیں مری رہ میں کنارے کتنے

جگر مراد آبادی

ہم تو اب ڈوب کر ہی ابھریں گے
وہ رہیں شاد جو کنارے ہیں

عرفان صدیقی

دیدۂ گریہ طلب، پشت فرس خالی ہے
تو نے دیکھا تھا ابھی نہر کنارے کس کو
اب جو چمکا ہے یہ خنجر تو خیال آتا ہے
تجھ کو دیکھا ہو کبھی نہر کنارے جیسے

جمال احسانی

کس صحرا کی دھول ہے سب کی آنکھوں میں
بے موج و بے رود کنارے کس کے ہیں

آنس معین

وہ کچھ گہری سوچ میں ایسے ڈوب گیا ہے
بیٹھے بیٹھے ندی کنارے ڈوب گیا ہے

تلوک چند محروم

کیا ہیر اب کہیں ہے نہ رانجھے کا جانشیں
کیوں اے چناب تیرے کنارے اداس ہیں

حفیظ جالندھری

اگر موج ہے بیچ دھارے چلا چل
وگرنہ کنارے کنارے چلا چل
کشتی نئی بنی کہ اٹھا لے گیا کوئی
تختے جو لگ گئے تھے کنارے کہاں گئے
اب ڈوبتوں سے پوچھتا پھرتا ہے ناخدا
جن کو لگا چکا ہوں کنارے کہاں گئے

سیف الدین سیف

کشتی تڑپ کے حلقۂ طوفاں میں رہ گئی
دیکھو تو کتنی دور کنارے چلے گئے
دیکھا تو پھر وہیں تھے چلے تھے جہاں سے ہم
کشتی کے ساتھ ساتھ کنارے چلے گئے

عزیز حامد مدنی

وقت ہی وہ خط فاصل ہے کہ اے ہم نفسو
دور ہے موجِ بلا اور کنارے ہوئے لوگ

احمد فراز

وہ جو آسودۂ ساحل ہیں انہیں کیا معلوم
اب کے موج آئی تو پلٹے گی کنارے لے کر
مجھ سے کیا ڈوبنے والوں کا پتہ پوچھتے ہو
میں سمندر کا حوالہ نہ کنارے کی مثال

کلیم عاجز

یہ سمندر ہے کنارے ہی کنارے جاؤ
عشق ہر شخص کے بس کا نہیں پیارے جاؤ
ڈوبنا ہو گا اگر ڈوبنا تقدیر میں ہے
چاہے کشتی پہ رہو چاہے کنارے جاؤ

ناصر کاظمی

پہنچے گور کنارے ہم
بس غمِ دوراں ہارے ہم