حیدر علی آتش

اس کے دیدار کی کیوں کر نہ ہوں آنکھیں مشتاق
دل ربا شے ہے عجب صورت زیبا ہے وہ رخ

داغ دہلوی

تم کو یہی شایاں ہے کہ تم دیتے ہو دشنام
مجھ کو یہی زیبا ہے کہ میں کچھ نہیں‌ کہتا

مصطفٰیٰ خان شیفتہ

پھر کہو گے اس کو دل، فرماؤ اے اربابِ دل
جو نہ ہو بے تاب و مضطر، روئے زیبا دیکھ کر

ظہیر کاشمیری

مر جائے گا دلِ حسرت انوار سحر میں
بے پردہ اگر تم رخِ زیبا نہ کرو گے

شکیل بدایونی

دل ہے تجلی رخِ زیبا لیے ہوئے
آغوش میں ہے چاند کو دریا لیے ہوئے
چاندنی میں رخِ زیبا نہیں دیکھا جاتا
ماہ و خورشید کو یکجا نہیں دیکھا جاتا

شاذ تمکنت

میں اندھیرے میں نہیں دن کے اجالے میں لٹا
اب کسے ڈھونڈے ہے شمع رخِ زیبا تیری