حیدر علی آتش

دیدہ و دل کو دکھایا چاہیے دیدار یار
حسن کے عالم سے آئینوں کو محرم کیجیے

داغ دہلوی

دل نے سیکھا شیوۂِ بیگانگی
ایسے نامحرم کو محرم کیا کریں
حیدرآباد اور لنگر یاد ہے
اب کے دلی میں محرم کیا کریں

جون ایلیا

اس شہر حیلہ جو میں جو محرم ملے مجھے
فریاد جانِ جاں وہی محرم ملے تمہیں

مجید امجد

ایک زمانے سے یہی رستہ زیرِ قدم ہے ، اک اک جھونکا محرم ہے
آج جو من کی اوٹ سے دیکھا، ہر سو اک ان دیکھی رت کی چھل بل ہے

مصطفیٰ زیدی

اتنے ربط اتنی شناسائی کے بعد
کون کس کے حال کا محرم رہا

احسان دانش

بہ ایمائے خرد تم دیکھتے ہو جس کو نفرت سے
وہ دیوانہ خرد کی اصل کا محرم بھی ہوتا ہے

جوش ملیح آبادی

گونجتا تھا جس سے کوہ بے ستون و دشت نجد
گوش جاں کو پھر انہیں نالوں کا محرم کیجیے

حفیظ ہوشیارپوری

کہوں بے درد کیوں اہلِ جہاں کو
وہ میرے حال سے محرم نہ ہوں گے

عزیز حامد مدنی

اک خواب آتشیں کا وہ محرم سا رہ گیا
دیوار و در میں شعلہ‌ٔ برہم سا رہ گیا

فانی بدایونی

راز آج مرے دم سے ہوا رازِ محبت
کچھ راز نہ تھا جب کوئی محرم نہ ہوا تھا
میری فطرت ہے گوش بر آواز
سن رہا ہوں نوائے محرم کیا

مجروح سلطان پوری

گو رات مری صبح کی محرم تو نہیں ہے
سورج سے ترا رنگِ حنا کم تو نہیں ہے