مرزا غالب

قاصد کو اپنے ہاتھ سے گردن نہ ماریے
اس کی خطا نہیں ہے یہ میرا قصور تھا

مصحفی غلام ہمدانی

پہلو سے مرے نکل گیا بت
کیا مجھ سے ہوا قصور اللہ

باقی صدیقی

بخش دیجے تو کوئی بات نہیں
آدمی سے قصور ہوتا ہے
خلد کا ذکر آ گیا تھا ذرا
شیخ حور و قصور تک پہنچا

جگر مراد آبادی

آنکھوں کا تھا قصور نہ دل کا قصور تھا
آیا جو میرے سامنے میرا غرور تھا
وہ تھے نہ مجھ سے دور نہ میں ان سے دور تھا
آتا نہ تھا نظر تو نظر کا قصور تھا

عبدالحمید عدم

تیری آنکھوں کو کر دیا سجدہ
میرا پہلا قصور ہے ساقی

شکیل بدایونی

شکوے ترے حضور کیے جا رہا ہوں میں
جو کچھ بھی ہو قصور کیے جا رہا ہوں میں
محو طواف کوچۂ ہستی میں رحمتیں
شاید کوئی قصور کیے جا رہا ہوں میں
ربط نیاز و ناز کا عالم تو دیکھنا
نادم ہیں وہ قصور کیے جا رہا ہوں میں

شاذ تمکنت

سنی سنائی پہ مت جا ذرا قریب تو آ
سزا نہ دے کہ محبت ہے بے قصور اب تک

قتیل شفائی

جو سمجھ لیا تجھے با وفا تو پھر اس میں تیری بھی کیا خطا
یہ خلل ہے میرے دماغ کا یہ مری نظر کا قصور ہے

نوح ناروی

کسی سے دل کا لگانا گناہ ہے ناصح
جو یہ قصور ہے تو یہ قصور میں نے کیا
وہ کریں گے مرا قصور معاف
ہو چکا کر چکے ضرور معاف
حسن کو بے قصور کہتے ہیں
ہے قصور آپ کا قصور معاف
وہ ہنسی آ گئی ترے لب پر
ہو گیا وہ مرا قصور معاف
خامشی ان کی مجھ سے کہتی ہے
اب ہوا اب ہوا قصور معاف
ہاتھ بھی جوڑے پانو پر بھی گرا
اب تو کہہ دو کیا قصور معاف
اور عادت مری خراب ہوئی
کاش کرتے نہ وہ قصور معاف