داغ دہلوی

اچھی صورت پہ غضب ٹوٹ کے آنا دل کا
یاد آتا ہے ہمیں ہائے زمانا دل کا
لے چلا جان مری روٹھ کے جانا تیرا
ایسے آنے سے تو بہتر تھا نہ آنا تیرا
یہ سمجھ کر تجھے اے موت لگا رکھا ہے
کام آتا ہے برے وقت میں آنا تیرا
یوں تو کیا آئے گا تو فرط نزاکت سے یہاں
سخت دشوار ہے دھوکے میں بھی آنا تیرا
جان جاتی دکھائی دیتی ہے
ان کا آنا نظر نہیں آتا
آپ ہی دیکھتے ہیں ہم کو تو
دل کا آنا نظر نہیں آتا

مصحفی غلام ہمدانی

اول تو ترے کوچے میں آنا نہیں ملتا
آؤں تو کہیں تیرا ٹھکانا نہیں ملتا

مصطفٰیٰ خان شیفتہ

ہائے اس برقِ جہاں سوز پر آنا دل کا
سمجھے جو گرمیِ ہنگامہ جلانا دل کا
ان کو منظور نہیں نیند کا آنا شبِ وصل
اس لیے کہتے ہیں غیروں کا فسانہ شبِ وصل
اب کس امید پہ واں جائے کوئی
کہ ہوا غیر کا آنا موقوف

میر مہدی مجروح

در مے خانہ ہوا بند صدا یہ ہے بلند
یاں حریفان قدح خوار نہ آنا ہرگز