داغ دہلوی

اس ادب سے تہہ شمشیر تڑپنا اے دل
کہ گماں تیری تپش پر ہو شکیبائی کا
وہ یہ کہتے ہیں مرا صبر پڑے گا تجھ پر
اب مجھے رنج نہیں اپنی شکیبائی کا
تھم گئے جم گئے آنکھوں میں لہو کے قطرے
خون ظاہر ہے مرے صبر و شکیبائی کا

مصحفی غلام ہمدانی

مصحفیؔ اب اک غزل لکھ تو غزل کی طرح سے
تا کرے عالم کا تاراج شکیبائی بسنت

الطاف حسین حالی

تم نے کیوں وصل میں پہلو بدلا
کس کو دعویٰ ہے شکیبائی کا
گھٹ گئیں خود تلخیاں ایام کی
یا گئی کچھ بڑھ شکیبائی بہت

شبلی نعمانی

پوچھتے کیا ہو جو حال شبِ تنہائی تھا
رخصت صبر تھی یا ترک شکیبائی تھا

فانی بدایونی

آ چلا ہے مجھے کچھ وعدۂ فردا کا یقیں
دل پہ الزام نہ آ جائے شکیبائی کا

احمد فراز

اے خدا جو بھی مجھے پندِ شکیبائی دے
اس کی آنکھوں‌ کو مرے زخم کی گہرائی دے

شاذ تمکنت

صدمۂ ہجر میں تو بھی ہے برابر کا شریک
یہ الگ بات تجھے تاب شکیبائی ہے

ناصر کاظمی

وہ تابِ درد وہ سودائے انتظار کہاں
انھی کے ساتھ گئی طاقتِ شکیبائی