داغ دہلوی

دردِ دل کا نہ کہیے یا کہیے
جب وہ پوچھے مزاج کیا کہیے

مصطفٰیٰ خان شیفتہ

طرزِ سخن کہے وہ مسلم ہے شیفتہؔ
دعوے زبان سے نہ کیے میں نے یا کیے
یہ طرزِ ترنم کہیں زنہار نہ ڈھونڈو
اے شیفتہ یا مرغِ چمن رکھتے ہیں، یا ہم

مومن خان مومن

دنیا ہی سے گیا میں جوں ہی ناز سے کہا
اب بھی گمان بد نہ گئے تیرے یا گئے
ناصح کفِ افسوس نہ مل چل تجھے کیا کام
پامال کریں گے وہ مجھے یا نہ کریں گے

مرزا رفیع سودا

گر کیجیے انصاف تو کی زور وفا میں
خط آتے ہی سب چل گئے اب آپ ہیں یا میں

باقی صدیقی

دل کسی صورت ٹھہر پاتا نہیں
تو نظر کے سامنے ہے یا نہیں
اور بھی تنگ ہو گئی دنیا
دل کو دنیا کا جب خیال یا

جگر مراد آبادی

اب تو یہ بھی نہیں رہا احساس
درد ہوتا ہے یا نہیں ہوتا
کچھ کھٹکتا تو ہے پہلو میں مرے رہ رہ کر
اب خدا جانے تری یاد ہے یا دل میرا

مجید امجد

پھول تو سب اک جیسے ہیں سب مٹی کے
رت کوئی بھی ہو دل کی یا دنیا کی

مصطفیٰ زیدی

مہر و وفا کے دشت نوردو جواب دو
تم کو بھی وہ غزال ملا یا نہیں ملا

الطاف حسین حالی

اعتراضوں کا زمانہ کے ہے حالیؔ پہ نچوڑ
شاعر اب ساری خدائی میں ہے یا ایک ہی شخص

خاطر غزنوی

کیا بھروسا ہے ترے لطف و کرم کا اے دوست
جس طرح سایۂ دیوار ہوا یا نہ ہوا

سیماب اکبر آبادی

آواز تو دو کسے پکاروں
تم ہو مرے دل میں یا تمنا

فانی بدایونی

فانیؔ بس اب خدا کے لیے ذکر دل نہ چھیڑ
جانے بھی دے بلا سے رہا یا نہیں رہا
یا الم کوشی رہی یا خود فراموشی رہی
دل کسی دن دل نہ تھا یا درد تھا یا کچھ نہ تھا
آپ کا دیوانہ تھا یہ ادعا باطل سہی
فانیؔ دیوانہ دیوانہ بھی تھا یا کچھ نہ تھا

احمد فراز

طنز ہیں سوختہ جانوں پہ گرجتے بادل
یا تو گھنگور گھٹائیں نہ اٹھا، یا برسا
کیسے رستوں سے چلے اور یہ کہاں پہنچے فراز
یا ہجومِ دوستاں تھا ساتھ ۔ یا کوئی نہیں

ناصر کاظمی

اسے ڈھونڈا وہ کہیں بھی نہ ملا
وہ کہیں بھی نہیں یا ہے دل میں