شیخ ابراہیم ذوق

کشتی سوار عمر ہوں بحر فنا میں ذوقؔ
جس دم بہا کے لے گیا طوفان بہہ گیا

مصحفی غلام ہمدانی

آساں نہیں دریائے محبت سے گزرنا
یاں نوح کی کشتی کو بھی طوفان کا ڈر ہے

جمال احسانی

پھر بدل جائے نہ اس وعدۂ امروز سے تو
اور ہمیں دوسرا طوفان اٹھانا پڑ جائے

رئیس فروغؔ

بادل گہرے شام سے ہیں
آخرِ شب طوفان سہی

بہزاد لکھنوی

پلکوں پہ رک گیا ہے آ کر جو ایک آنسو
یہ قطرہ بڑھتے بڑھتے طوفان ہو نہ جائے

زہرا نگاہ

کوئی دھڑکن ہے نہ آنسو نہ خیال
وقت کے ساتھ یہ طوفان گئے

سیف الدین سیف

اور ہوں گے جنہیں طوفان ڈبو دیتا ہے
ہم جو ڈوبے تو بہت آئیں گے طوفان یہاں
سفینے برسوں نہ رکھیں گے ساحلوں پہ قدم
تمہیں گماں ہے کہ طوفان ایک رات کا ہے

سلام مچھلی شہری

وہ چہرے جو تھے حسن کے طوفان کی طرح
کمروں میں چپ ہیں کاغذی گلدان کی طرح

شاد عظیم آبادی

مے خانہ ہے جائے عیش و طرب یاں بیٹھ کے رونا کیا معنی
کیا مفت کا اپنے سر تو نے اے دیدۂ تر طوفان لیا

افضل منہاس

ایک پیکر یوں چمک اٹھا ہے میرے دھیان میں
کوئی جگنو اڑ رہا ہو جس طرح طوفان میں

محسن احسان

سرِ ساحل تھے تو یہ سیلِ بلا کچھ بھی نہ تھا
زد میں جب آئے تو اندازۂ طوفان ہوا