شیخ ابراہیم ذوق

ذوقؔ جو مدرسے کے بگڑے ہوئے ہیں ملا
ان کو مے خانے میں لے آؤ سنور جائیں گے

مصحفی غلام ہمدانی

کہیں غش میں تھا میں پڑا ہوا سنو اور قہر کی بات تم
مجھے دیکھنے کو جو آئے وہ تو بگڑ سنور کے چلے گئے
بگڑا کیے ہیں ہم بھی اس نازنیں سے ہر دم
کام اپنے رفتہ رفتہ یونہی سنور پڑے ہیں

باقی صدیقی

حالات کا انتظار باقیؔ
وہ زلف ابھی سنور رہی ہے

اسرار الحق مجاز

حسن کا غم بھی حسیں فکر حسیں درد حسیں
ان کو ہر رنگ میں ہر طور سنور جانا تھا

بشیر بدر

کبھی تو شام ڈھلے اپنے گھر گئے ہوتے
کسی کی آنکھ میں رہ کر سنور گئے ہوتے

ضیا جالندھری

تمہاری چاہت کی چاندنی سے ہر اک شبِ غم سنور گئی ہے
سنہری پوروں سے خواب ریزے سمیٹتی ہر سحر گئی ہے

ظہیر کاشمیری

جلوس ناز کبھی تو ادھر سے گزرے گا
کبھی تو دل کے مقدر سنور ہی جائیں گے

احمد راہی

کیا جانیے کیا تھا اس نظر میں
الجھے تو سنور سنور گئے ہم

جلیل مانک پوری

آئینہ کس سے دیکھا جاتا ہے
رشک کے مارے وہ سنور نہ سکا

جوش ملیح آبادی

سحر کو سینۂ عالم میں پرتو ڈالنے والے
تصدق اپنے جلوے کا مرا باطن سنور جائے

حفیظ جالندھری

اٹھو اب دیر ہوتی ہے وہاں چل کر سنور جانا
یقینی ہے گھڑی دو میں مریضِ غم کا مر جانا

حفیظ ہوشیارپوری

اب ان کے حسن میں حسنِ نظر بھی شامل ہے
کچھ اور میری نظر سے سنور گیا کوئی

خاطر غزنوی

تیرے بدن کی لو میں کرشمہ نمو کا تھا
غنچے جو تیری سیج پہ جاگے سنور گئے

شکیل بدایونی

حسن سے لیجیے تنظیم دو عالم کا سبق
صبح ہوتی ہے تو گیسو بھی سنور جاتے ہیں

عزیز حامد مدنی

کوئی ہاتھ دشنۂ جاں ستاں کوئی ہاتھ مرہم پرنیاں
یہ تو ہاتھ ہاتھ کی بات ہے کوئی وقت پا کے سنور گئی

اختر ہوشیارپوری

یہ چندبے حرف وصوت خاکے مرا اثاثہ
میں جن کو غزلوں کا نام دے کر سنور رہا تھا

احمد فراز

سنا ہے آئنہ تمثال ہے جبیں اس کی
جو سادہ دل ہیں اسے بن سنور کے دیکھتے ہیں
لٹ چکے عشق میں اک بار تو پھر عشق کرو
کس کو معلوم کہ تقدیر سنور بھی جائے

کلیم عاجز

جی یہ چاہے ہے کہ پوچھوں کبھی ان زلفوں سے
کیا تمہارا بھی سنور جانے کو جی چاہے ہے

محبوب خزاں

اخبار میں روزانہ وہی شور ہے یعنی
اپنے سے یہ حالات سنور کیوں نہیں جاتے