مصحفی غلام ہمدانی

ہوں شیخ مصحفی کا میں حیران شاعری
اللہ مفلسی میں یہ کچھ شان شاعری
ہم بھی ہیں ترے حسن کے حیران ادھر دیکھ
کیا آئینہ دیکھے ہے مری جان ادھر دیکھ

باقی صدیقی

اس لگاؤ پہ ہے اک شخص سے لاگ
تھی نئی بات کہ حیران ہوئے

عرفان صدیقی

آخر ہے اعتبارِ تماشا بھی کوئی چیز
انسان تھوڑی دیر کو حیران چاہیے

جمال احسانی

وہ اس جہان سے حیران جایا کرتے ہیں
جو اپنے آپ کو پہچان جایا کرتے ہیں

بہزاد لکھنوی

اللہ ری بے نقابی اس جان مدعا کی
میری نگاہ حسرت حیران ہو نہ جائے
بہزادؔ اس لیے میں کہتا نہیں ہوں دل کی
ڈرتا ہوں سن کے دنیا حیران ہو نہ جائے

جلیل مانک پوری

یہ صورت ہوئی ہے کہ آئینہ پہروں
مرے منہ کو تکتا ہے حیران ہو کر

شاد عظیم آبادی

یقیں کر لے کہ خود وہ جلوہ گر پردے میں ہے ورنہ
یہی ظالم گماں تیرا تجھے حیران کر دے گا

شکیل بدایونی

تابِ نظارہ الٰہی توبہ
جلوہ حیران ہوا جاتا ہے

احمد فراز

اس کی نوازشوں نے تو حیران کر دیا
میں میزبان تھا مجھے مہمان کر دیا

قتیل شفائی

بے لغزشِ پا مست ہوں ان آنکھوں سے پی کر
یوں محتسب شہر کو حیران کیا جائے

محسن احسان

اس کڑی دھوپ کے سناٹے میں حیران ہوا
گھر سے جو بھی نکل آیا وہ پشیمان ہوا
تو بھی اس غم کدۂ دہر میں آ کر محسنؔ
بوئے گل کی طرح آوارۂ حیران ہوا

محسن نقوی

کل تک جس کے گرد تھا رقصاں اک انبوہ ستاروں کا
آج اسی کو تنہا پا کر میں تو بہت حیران ہوا