مرزا غالب

مہربانی ہائے دشمن کی شکایت کیجیے
یا بیاں کیجے سپاس لذتِ آزار دوست
کیا آبروئے عشق، جہاں عام ہو جفا
رکتا ہوں تم کو بے سبب آزار دیکھ کر
وا حسرتا کہ یار نے کھینچا ستم سے ہاتھ
ہم کو حریص لذتِ آزار دیکھ کر
دہن شیر میں جا بیٹھیے ، لیکن اے دل
نہ کھڑے ہوجیے خوبانِ دل آزار کے پاس
بے عشق عمر کٹ نہیں سکتی ہے اور یاں
طاقت بہ قدرلذت آزار بھی نہیں
دے مجھ کو شکایت کی اجازت کہ ستمگر
کچھ تجھ کو مزہ بھی مرے آزار میں آوے

حیدر علی آتش

طرہ اسے جو حسنِ دل آزار نے کیا
اندھیر گیسوئے سیہ یار نے کیا
فرصت ملی نہ گریہ سے اک لحظہ عشق میں
پانی مرے لہو کو اس آزار نے کیا

داغ دہلوی

تو ہے مشہور دل آزار یہ کیا
تجھ پر آتا ہے مجھے پیار یہ کیا
وحشتِ دل کے سوا الفت میں
اور ہیں سینکڑوں آزار یہ کیا
دل مبتلائے لذتِ آزار ہی رہا
مرنا فراقِ یار میں دشوار ہی رہا
لذت وفا میں ہے نہ کسی کی جفا میں ہے
دل دار ہی رہا نہ دل آزار ہی رہا

مصحفی غلام ہمدانی

ترا شوقِ دیدار پیدا ہوا ہے
پھر اس دل کو آزار پیدا ہوا ہے
فرہاد بچا عشق سے نے قیس نہ وامق
جی لے ہی کے جاتا ہے یہ آزار غضب ہے

مصطفٰیٰ خان شیفتہ

نہ ملا ہم کو کبھی تیری گلی میں آرام
نہ ہوا ہم پہ جز آزار ترے کوچے میں
سرخیل عاشقاں مجھے کہتے ہیں بوالہوس
عاشق کا اس کو مائلِ آزار دیکھ کر

مومن خان مومن

دیکھا عذاب رنج دلِ زار کے لیے
عاشق ہوئے ہیں وہ مرے آزار کے لیے