مرزا غالب

سر پھوڑنا وہ! 'غالبِ شوریدہ حال' کا
یاد آ گیا مجھے تری دیوار دیکھ کر
مر گیا پھوڑ کے سر غالبِ وحشی ، ہے ہے !
بیٹھنا اس کا وہ ، آ کر ، تری دیوار کے پاس
میں تو دیوانہ ہوں اور ایک جہاں ہے غماز
گوش ہیں در پسِ دیوار کہوں یا نہ کہوں
شوریدگی کے ہاتھ سے سر ہے وبالِ دوش
صحرا میں اے خدا کوئی دیوار بھی نہیں
برشکال گریۂِ عاشق ہے دیکھا چاہیے
کھل گئی ماند گلِ سو جا سے دیوارِ چمن
ہے نزاکت بس کہ فصلِ گل میں معمارِ چمن
قالبِ گل میں ڈھلی ہے خشتِ دیوارِ چمن
جس بزم میں تو ناز سے گفتار میں آوے
جاں کالبد صورتِ دیوار میں آوے

امام بخش ناسخ

وصل کی شب چاندنی دیوار سے جانے نہ پائے
منتیں کرتا ہوں ہر خار سرِ دیوار کی
دھوپ ہے پر میرے روز ہجر کا
ہے برنگ سایۂِ دیوار رنگ
روشن اے ماہ کیا تو نے سیہ خانہ مرا
تیرے جلوے سے ہوئے ہیں در و دیوار سفید
ظالم ترے کوچے سے قدم اٹھ نہیں سکتا
کیوں کر نہ چلوں سایۂ دیوار کی رفتار
دیکھ کر تجھ کو قدم اٹھ نہیں سکتا اپنا
بن گئے صورتِ دیوار ترے کوچے میں
پاؤں پھیلائے زمیں پر میں پڑا رہتا ہوں
صورت سایۂ دیوار ترے کوچے میں
ٹکراؤں واں جو سر تو وہ کہتا ہے کیا مجھے
صاحب نہ مجھ غریب کی دیوار توڑیے

انشاء اللہ خان انشا

یہ اپنی چال ہے افتادگی سے ان دنوں پہروں
نظر آیا جہاں پر سایۂ دیوار بیٹھے ہیں

بہادر شاہ ظفر

طوبی جنت سے اس کو کام کیا ہے حوروش
جو کہ ہیں آسودہ سائے میں تری دیوار کے

حیدر علی آتش

سعیِ لا حاصل مداوائے مریضِ عشق ہے
تھامنا ممکن نہیں گرتی ہوئی دیوار کا
اس پری رو کے جو کوچہ کا گزرتا ہے خیال
بن کے جن سایہ لپٹا ہے مجھے دیوار کا
بے یار سر پٹکنے سے ہلتا ہے گھر مرا
رہتا ہے زلزلہ در و دیوار کے لیے
بیٹھا جو اس کے سایہ میں دیوانہ ہو گیا
سایہ پری کا ہے تری دیوار کے لیے
اس بادشاہِ حسن کی منزل میں چاہیے
بالِ ہما کی پر چھتی دیوار کے لیے
چونا بنیں گے بعد فنا اپنے استخواں
دولت سرائے یار کی دیوار کے لیے
میری نگہ کے رشک سے روزن کو چاندی
رخنہ یہ قصر یار کی دیوار نے کیا
حیرت سے پا بہ گل ہوے روزن کو دیکھ کر
دیوار ہم کو یار کی دیوار نے کیا
حسرت جلوۂِ دیدار لیے پھرتی ہے
پیش روزن پسِ دیوار لیے پھرتی ہے
دیکھنے دیتی نہیں اس کو مجھے بے ہوشی
ساتھ کیا اپنے یہ دیوار لیے پھرتی ہے
جوشِ وحشت میں بھی میں چڑھ کے نہ اس پر دوڑا
لے گئے حسرت خار سرِ دیوار قدم
کوچہ گردی یہ شب و روز کی بے وجہ نہیں
ایڑیاں رگڑیں گے کس کے پسِ دیوار قدم
وعدہ تھا ہمیں سے لبِ بام آنے کا ہونا
سایہ کی طرح سے پسِ دیوار ہمیں تھے

داغ دہلوی

یہ شامت آئی کہ اس کی گلی میں دل نے کہا
کھلا ہے روزنِ دیوار دیکھتے جاؤ

مصحفی غلام ہمدانی

اس شاہد نہاں کا کشتہ ہوں میں کہ جس نے
کھینچی ہے درمیاں میں دیوار زندگی سے
اب تک حرم وصل سے محرم نہ ہوئے ہم
کعبے میں حجاب در و دیوار غضب ہے
غیروں سے وہ خلوت میں ہے مشغول ظرافت
ہم رشک کے مارے پسِ دیوار کھڑے ہیں
ان شرم زدوں کو بھی بلا سامنے اپنے
جو شرم کے مارے پسِ دیوار کھڑے ہیں
سر پھوڑ کر کے جائیں گے اس کی گلی میں ہم
رنگیں گے خون سے در و دیوار ہو سو ہو
عاشق جو تیری زلف کا ہو اس کو تو صنم
لے جا کے تیرہ شب پسِ دیوار مار ڈال
ہوں وہ دیوانہ کہ اک شب بھی جو میں گھر میں رہوں
رات کو صبح کروں کر در و دیوار سے بحث
دعوت ہے کس کی بزم فلک میں جو کب سے ہیں
آنکھیں لگائے رخنۂِ دیوار ہر طرف

مصطفٰیٰ خان شیفتہ

کیا بن گیا ہوں صورتِ دیوار دیکھنا
صورت کسی کی میں سرِ دیوار دیکھ کر

مومن خان مومن

اللٰہ رے ناتوانی جب شدت قلق میں
بالیں سے سر اٹھایا دیوار تک نہ پہنچا

فیض احمد فیض

جیسے ہم بزم ہیں پھر یار طرح دار سے ہم
رات ملتے رہے اپنے در و دیوار سے ہم

مرزا رفیع سودا

خاموش اپنے کلبۂ احزاں میں روز و شب
تنہا پڑے ہوئے در و دیوار دیکھنا
مغرورِ حسن کا ہے تجھے یہ کہاں خبر
یعنی کہ کون ہے پسِ دیوار الغیاث
لو خوش رہو گھر اپنے میں جس شکل سے ہو تم
دو چار نالے ہم پسِ دیوار کر چلے
نالاں ہوں مدتوں سے ترے سایہ کے تلے
پوچھا نہ یہ کبھو پسِ دیوار کون ہے

باقی صدیقی

راہ میں اور بھی دیواریں ہیں
ایک حالات ی دیوار نہیں
یہ سر سے نکلتی ہوئی لوگوں کی فصیلیں
دل سے مگر اونچی کوئی دیوار نہیں ہے
ہر طرف آگے لگی ہے باقیؔ
مشورہ دیتی ہے دیوار غلط
صبح میں شام کے اثار بھی ہیں
حادثے کچھ پسِ دیوار بھی ہیں
دل کو یوں تھام رکھا ہے جیسے
بیٹھ جائے گی یہ دیوار ابھی

جون ایلیا

دھوپ اٹھاتا ہوں کہ اب سر پہ کوئی بار نہیں
بیچ دیوار ہے اور سایۂ دیوار نہیں
باہر نکل کے آ در و دیوار ذات سے
لے جائے گی ہوا در و دیوار کو ترے
یہ جو سنا اک دن وہ حویلی یکسر بے آثار گری
ہم جب بھی سائے میں بیٹھے دل پر اک دیوار گری

جگر مراد آبادی

یہ مصرع کاش نقش ہر در و دیوار ہو جائے
جسے جینا ہو مرنے کے لیے تیار ہو جائے
حریمِ ناز میں اس کی رسائی ہو تو کیوں کر ہو
کہ جو آسودہ زیر سایۂ دیوار ہو جائے

عبدالحمید عدم

آوارگی کا شوق بھڑکتا ہے اور بھی
تیری گلی کا سایۂ دیوار دیکھ کر
تسکینِ دل کی ایک ہی تدبیر ہے فقط
سر پھوڑ لیجیے کوئی دیوار دیکھ کر

قمر جلالوی

حرج ہی کیا ہے الگ بیٹھا ہوں محفل میں خموش
تم سمجھ لینا کہ یہ بھی نقش ہے دیوار کا
خانہ بربادوں کو سائے میں بٹھانے کے لیے
آپ گرتی ہوئے دیوار دیے دیتے ہیں

شکیب جلالی

آ کے پتھر تو مرے صحن میں دو چار گرے
جتنے اس پیڑ کے پھل تھے ‘ پسِ دیوار گرے
مجھے گرنا ہے تو میں اپنے ہی قدموں میں گروں
جس طرح سایہِ دیوار پہ دیوار گرے
دیکھ کر اپنے دروبام‘ لرز جاتا ہوں
میرے ہم سائے میں جب بھی کوئی دیوار گرے
سرپٹک کر درِ زنداں پہ صبا نے یہ کہا
ہے دریچہ‘ نہ کوئی روزنِ دیوار یہاں
دل کا آفاق سمٹتا ہی چلا جاتا ہے
اور پھیلے گا کہاں تک در و دیوار کا شہر
پھول مرجھا گئے ، گلدان بھی گر کر ٹوٹا
کیسی خوشبو میں بسے ہیں در و دیوار اب تک
تیشہِ غم سے ہوئی روح تو ٹکڑے ٹکڑے
کیوں سلامت ہے مرے جسم کی دیوار اب تک

عرفان صدیقی

عرضِ وفا تو فرض ہے ناچار کرتے ہیں
فریاد ہم بہت پسِ دیوار کرتے ہیں
یہاں وہ حشر بپا تھا کہ میں بھی آخرکار
اگرچہ نقش تھا دیوار سے نکل آیا
کیا نقش ہوا دل کے اندھیرے میں نمودار
کیا روزنِ روشن مری دیوار میں آیا
جب یہ عالمِ ہو تو لکھیے لب و رخسار پہ خاک
اڑتی ہے خانۂ دل کے در و دیوار پہ خاک
تجھ کو سیلاب کے آنے کی خبر دے دی ہے
تیرا در ہے تری دیوار ہے میں کیا جانوں
جشنِ مہتاب گرفتار بھی کر سکتے ہیں
روشنی روزنِ دیوار بھی کر سکتے ہیں
مرے شانوں پہ دو لکھنے والے ، تحریر سرِ دیوار لکھیں
مرے دل کی گواہی درج کریں، مرے ہونٹوں کا اقرار لکھیں
شاید کہ اتر آئے سوا نیزے پہ سورج
کل کے لیے کچھ سایۂ دیوار بچائیں
قیدخانے میں یہ مہتاب کہاں سے آیا
کیا کوئی روزنِ دیوار ہے خاکم بدہن
ایک ہی چیز کو رہنا ہے سلامت، پیارے
اب جو سرشانوں پہ رکھا ہے تو دیوار نہ رکھ
کب لوٹیں گے وہ وادیِ غربت کے مسافر
اک عمر سے روشن سرِ دیوار ہیں ہم بھی
کسی کو شہر میں سیلِ بلا کی زد پہ آنا ہے
چلو یہ کام بھی میرے در و دیوار کردیں گے
اب سحر تک تو جلوں گا کوئی آئے کہ نہ آئے
مجھ کو روشن سرِ دیوار کیا ہے اس نے
کوئی نتیجہ نکلتا نظر نہیں آتا
صدائے گریہ کو دیوار سے معاملہ ہے

مصطفیٰ زیدی

دیکھ اے دشتِ جنوں بھید نہ کھلنے پائے
ڈھونڈنے آئے ہیں گھر کے در و دیوار مجھے

اختر حسین جعفری

تپش گلزار تک پہنچی لہو دیوار تک آیا
چراغ خود کلامی کا دھواں بازار تک آیا

الطاف حسین حالی

وفا اغیار کی اغیار سے سن
مری الفت در و دیوار سے پوچھ

جمال احسانی

وہ مثلِ آئینہ دیوار پر رکھا ہوا تھا
جو اک انعام میری ہار پر رکھا ہوا تھا

ادا جعفری

ہوا تو ہم سفر ٹھہری سمجھ میں کس طرح آئے
ہواؤں کا ہماری راہ میں دیوار ہو جانا
کچھ زخم کی رنگت میں گلِ تر کے قریں تھے
کچھ نقش کہ ہیں نقش بہ دیوار بہت ہیں
ٹھہروں تو چٹانوں سی کلیجے پہ کھڑی ہے
جاؤں تو مرے ساتھ ہی دیوار چلے ہے

زہرا نگاہ

اک یہ بھی ادائے دل آشفتہ سراں تھی
بیٹھے نہ کہیں سایۂ دیوار کے ہوتے
دیوانوں کو اب وسعتِ صحرا نہیں درکار
وحشت کے لیے سایۂ دیوار بہت ہے

ظہیر کاشمیری

وہ محفلیں وہ مصر کے بازار کیا ہوئے
اے شہرِ دل ترے در و دیوار کیا ہوئے
جب خامشی ہی بزم کا دستور ہو گئی
میں آدمی سے نقش بہ دیوار بن گیا

عبید اللہ علیم

اس ہجرتی کو کام ہوا ہے کہ رات دن
بس وہ چراغ اور وہ دیوار دیکھنا

علی سردار جعفری

صحنِ زنداں میں ہے پھر رات کے تاروں کا ہجوم
شمع کی طرح فروزاں سرِ دیوار آنکھیں
ان کے آنے کو چھپاؤں تو چھپاؤں کیوں کر
بدلا بدلا سا ہے میرے در و دیوار کا رنگ

ثروت حسین

یہ انتہائے مسرت کا شہر ہے ثروتؔ
یہاں تو ہر در و دیوار اک سمندر ہے

جوش ملیح آبادی

اللہ رے حسن دوست کی آئینہ داریاں
اہل نظر کو نقش بہ دیوار کر دیا

حفیظ ہوشیارپوری

لمحات انتظار کی رفتار دیکھنا
وہ بار بار سایۂ دیوار دیکھنا
دردِ فراق کی سحر اولیں حفیظؔ
اٹھتے ہی جانب در و دیوار دیکھنا

سیف الدین سیف

دیکھنا کوچۂ جاناں میں کہیں سیفؔ نہ ہو
ایک سایا سا نظر آتا ہے دیوار کے ساتھ
اس مسافر کی نقاہت کا ٹھکانہ کیا ہے
سنگِ منزل جسے دیوار نظر آنے لگے

سلام مچھلی شہری

اے مرے گھر کی فضاؤں سے گریزاں مہتاب
اپنے گھر کے در و دیوار کو کیسے چھوڑوں

عزیز حامد مدنی

بادل اٹھے ہیں چشمک برق و شرار ہے
منہ دیکھتے ہو صورتِ دیوار کچھ کہو
آغاز ہر تغیر عالم کی حد ہوا
اس کی گلی کا سایۂ دیوار کچھ کہو

فانی بدایونی

بے ادب گریۂ محرومی دیدار نہیں
ورنہ کچھ در کے سوا حاصل دیوار نہیں
آسماں بھی ترے کوچہ کی زمیں ہے لیکن
وہ زمیں جس پہ ترا سایۂ دیوار نہیں

افضل منہاس

پہلے تو سر کو پھوڑ لیا اس کو دیکھ کر
پھر میں بھی ایک روزنِ دیوار ہو گیا

اکبر حمیدی

دیکھنے کو کوئی تیار نہیں ہے بھائی
دشت بھی بے در و دیوار نہیں ہے بھائی

احمد فراز

دو گھڑی اس سے رہو دور تو یوں لگتا ہے
جس طرح سایۂ دیوار سے دیوار جدا
کج اداؤں کی عنایت ہے کہ ہم سے عشاق
کبھی دیوار کے پیچھے کبھی دیوار کے بیچ
آ کے دیکھو تو سہی شہر مرا کیسا ہے
سبزہ و گل کی جگہ ہے در و دیوار پہ خاک
اس قدر خوف ہے اب شہر کی گلیوں میں کہ لوگ
چاپ سنتے ہیں تو لگ جاتے ہیں دیوار کے ساتھ
ہم کو اس شہر میں تعمیر کا سودا ہے جہاں
لوگ معمار کو چن دیتے ہیں دیوار کے ساتھ
چل نکلتی ہیں غمِ یار سے باتیں کیا کیا
ہم نے بھی کیں در و دیوار سے باتیں کیا کیا
گھر تو کیا گھر کی شباہت بھی نہیں ہے باقی
ایسے ویران ہوئے ہیں در و دیوار کہ بس
اور کچھ دن بیٹھنے دو کوئے جاناں میں ہمیں
رفتہ رفتہ سایۂ دیوار بن جائیں گے ہم
اب کوئی اشارہ ہے نہ پیغام نہ آہٹ
بام و در و دیوار بڑی دیر سے چپ ہیں
روگ ایسے بھی غمِ یار سے لگ جاتے ہیں
در سے اٹھتے ہیں تو دیوار سے لگ جاتے ہیں
وہ میرے گھر کا کرے قصد جب تو سائے سے
کئی قدم در و دیوار چل کے دیکھتے ہیں
جنون زینت آرائش مکاں کے لیے
کئی مکیں در و دیوار بیچ دیتے ہیں
ویرانی میں بڑھ کر تھے بیاباں سے تو پھر کیوں
شرمندہ کیا ہے در و دیوار نے میرے
اب روشنی ہوتی ہے کہ گھر جلتا ہے دیکھیں
شعلہ سا طوافِ در و دیوار کرے ہے
اجاڑ گھر میں یہ خوشبو کہاں سے آئی ہے
کوئی تو ہے در و دیوار کے علاوہ بھی
بجھا ہے دل تو غمِ یار اب کہاں تو بھی
بسان نقش بہ دیوار اب کہاں تو بھی

شاذ تمکنت

اے جنوں دشت میں دیوار کہاں سے لاؤں
میں تماشا سہی بازار کہاں سے لاؤں
نہیں یہ فکر کہ سر پھوڑنے کہاں جائیں
بہت بلند ہے اپنے وجود کی دیوار
شاذؔ سورج بھی تماشائی ہوا آج کے دن
رخصت سایۂ دیوار ہے دیوار سے دیکھ

فراق گورکھپوری

غش کھا کے گرے موسیٰ اللہ ری مایوسی
ہلکا سا وہ پردہ بھی دیوار نظر آیا
سر پٹکنے کو پٹکتا ہے مگر رک رک کر
تیرے وحشی کو خیال در و دیوار تو ہے

قتیل شفائی

غم لگے رہتے ہیں ہر آن خوشی کے پیچھے
دشمنی دھوپ کی ہے سایۂ دیوار کے ساتھ
ملا تھا پہلے دروازے سے دروازہ
لیکن اب دیوار سے ہے دیوار جدا
ایک ذرا سا دل ہے جس کو توڑ کے بھی تم جا سکتے ہو
یہ سونے کا طوق نہیں یہ چاندی کی دیوار نہیں ہے
اس چیز کا کیا ذکر جو ممکن ہی نہیں ہے
صحرا میں کبھی سایۂ دیوار نہ مانگو
کیسے کیسے بھید چھپے ہیں پیار بھرے اقرار کے پیچھے
کوئی پتھر تان رہا ہے شیشے کی دیوار کے پیچھے
کیا وہ نظروں کو جھروکے میں معلق کر دیں
جو ترے سایۂ دیوار تک آ پہنچے ہیں
کمندیں ڈالنے آئے تھے جو بام ثریا پر
وہی اب سایۂ دیوار سے آگے نہیں جاتے

مجروح سلطان پوری

بے تیشہ نظر نہ چلو راہ رفتگاں
ہر نقشِ پا بلند ہے دیوار کی طرح
دکھلا کے وہ تو لے بھی گیا شوخی خرام
اب تک ہیں رقص میں در و دیوار دیکھیے
جست کرتا ہوں تو لڑ جاتی ہے منزل سے نظر
حائلِ راہ کوئی اور بھی دیوار سہی

محسن احسان

کڑکتی دھوپ میں اب اور کس جگہ بیٹھوں
سمٹ کے بن گیا دیوار سایۂ دیوار
زلزلوں نے کیا یوں شہر کو مسمار کہ بس
چیخ اٹھے خوف سے بام و در و دیوار کہ بس
ہم بھی زندہ ہیں عجب کاوش اظہار کے ساتھ
گفتگو کرتے ہیں گھر کے در و دیوار کے ساتھ

محسن نقوی

قتل چھپتے تھے کبھی سنگ کی دیوار کے بیچ
اب تو کھلنے لگے مقتل بھرے بازار کے بیچ
کس نے سنگ خامشی پھینکا بھرے بازار پر
اک سکوتِ مرگ طاری ہے در و دیوار پر

ناصر کاظمی

کس طرح گزرے گا ناصر فرصتِ ہستی کا دن
جم گیا دیوار بن کر سایۂ دیوار بھی