مرزا غالب

کیوں کر اس بت سے رکھوں جان عزیز!
کیا نہیں ہے مجھے ایمان عزیز!

امام بخش ناسخ

وہ روئے کتابی تو ہے قرآن ہمارا
کہتے ہیں جسے عشق ہے ایمان ہمارا

انشاء اللہ خان انشا

ملت میں جس کی تو ہوئی اس کی قسم تجھے
اور اپنے دین مذہب و ایمان کی قسم

داغ دہلوی

کعبے کی سمت جا کے مرا دھیان پھر گیا
اس بت کو دیکھتے ہی بس ایمان پھر گیا
خاطر سے یا لحاظ سے میں مان تو گیا
جھوٹی قسم سے آپ کا ایمان تو گیا
دیکھا ہے بت کدے میں جو اے شیخ کچھ نہ پوچھ
ایمان کی تو یہ ہے کہ ایمان تو گیا

شیخ ابراہیم ذوق

زاہد شراب پینے سے کافر ہوا میں کیوں
کیا ڈیڑھ چلو پانی میں ایمان بہہ گیا

اختر شیرانی

میں آرزوئے جاں لکھوں یا جان آرزو!
تو ہی بتا دے ناز سے ایمان آرزو!
ایمان و جاں نثار تری اک نگاہ پر
تو جان آرزو ہے تو ایمان آرزو!

بہزاد لکھنوی

تجھ پر مری محبت قربان ہو نہ جائے
یہ کفر بڑھتے بڑھتے ایمان ہو نہ جائے

تلوک چند محروم

حسن ہے جانِ غزل اور عشق ایمان غزل
کائنات شعر میں ہے خوب سامان غزل

حسرت موہانی

اس بت کے پجاری ہیں مسلمان ہزاروں
بگڑے ہیں اسی کفر میں ایمان ہزاروں

رسا چغتائی

میں جھوٹا تو دنیا جھوٹی
میرا یہ ایمان ہے سائیں

سیف الدین سیف

ایک سے ایک ہے غارت گر ایمان یہاں
اے مرے دل ترا اللہ نگہبان یہاں
ان سے بھی چھین لو گے یاد اپنی
جن کا ایمان ہو گئی ہو گی

شاد عظیم آبادی

جس ہاتھ سے مجھ کو قتل کیا اس ہاتھ کا کلمہ پڑھوایا
لی جان تو خیر احسان کیا قاتل نے مگر ایمان لیا

شکیل بدایونی

حرم و دیر کے جلووں کی قسم
کفر ایمان ہوا جاتا ہے
ہے مرا ذوق جنوں کفر و خرد کی زد میں
اے خدا اب تو اٹھا لے مجھے ایمان کے ساتھ

فانی بدایونی

وہ جام کفر پرور بھر دے کہ مست کر دے
مستوں کے دل میں ساقی ایمان رہ نہ جائے

فراق گورکھپوری

مری نظریں بھی ایسے قاتلوں کا جان و ایماں ہیں
نگاہیں ملتے ہی جو جان اور ایمان لیتے ہیں

قتیل شفائی

پربت پربت گھوم چکا ہوں صحرا صحرا چھان رہا ہوں
ہر منزل کے حق میں لیکن کافر کا ایمان رہا ہوں