فیض احمد فیض

سو پیکاں تھے پیوستِ گلو، جب چھیڑی شوق کی لے ہم نے
سو تیر ترازو تھے دل میں جب ہم نے رقص آغاز کیا
بے پئے ہوں کہ اگر لطف کرو آخرِ شب
شیشہء مے میں‌ ڈھلے صبح کے آغاز کا رنگ

یگانہ چنگیزی

کیسے حیراں تھے تم آئینے میں جب آنکھ لڑی
آج تک یاد ہے اس عشق کا آغاز مجھے

قمر جلالوی

کیا ہو انجامِ شبِ ہجر خدا ہی جانے
اے قمر شام سے تاروں کا جو آغاز نہ ہو

الطاف حسین حالی

ہو گا انجام دیکھئے کیا کچھ
ہے پر آشوب جب کہ یہ آغاز

عبید اللہ علیم

میں پوچھ لوں کہ کیا ہے مرا جبر و اختیار
یارب یہ مسئلہ کبھی آغاز سے اٹھا
پھر یہ کھیل تماشا سارا کس کے لیے اور کیوں صاحب
جب اس کے انجام میں چپ ہے جب اس کے آغاز میں چپ

جوش ملیح آبادی

موت کو اہل دل سمجھتے ہیں
زندگانی عشق کا آغاز

عزیز حامد مدنی

گل کا وہ رخ بہار کے آغاز سے اٹھا
شعلہ سا عندلیب کی آواز سے اٹھا
کانٹے زمیں سے اور زیادہ ہوئے طلوع
اک مسئلہ بہار کے آغاز سے اٹھا

اکبر حمیدی

کہیں تو حرف آخر ہوں میں اکبرؔ
کسی کا نقطۂ آغاز ہوں میں

فراق گورکھپوری

اک ذرا ہو نشۂ حسن میں انداز خمار
اک جھلک عشق کے انجام کی آغاز تو دے

قابل اجمیری

ہمیں کیا آپ انجام محبت سے ڈراتے ہیں
ہمارے خون سے ہر دور کا آغاز ہوتا ہے