مرزا غالب

مہرباں ہو کے بلالو مجھے ، چاہو جس وقت
میں گیا وقت نہیں ہوں کہ پھر آ بھی نہ سکوں
کبھی نیکی بھی اس کے جی میں ، گر آ جائے ہے مجھ سے
جفائیں کر کے اپنی یاد ، شرما جائے ہے مجھ سے
دیکھنا قسمت کہ آپ اپنے پہ رشک آ جائے ہے
میں اسے دیکھوں، بھلا کب مجھ سے دیکھا جائے ہے

انشاء اللہ خان انشا

مجھ سے اغیار کوئی آنکھ ملا سکتے ہیں
منہ تو دیکھو وہ مرے سامنے آ سکتے ہیں
ٹک عالم اے جنوں تو دکھا وہ کہ جس سے صاف
لاہوت کا سماں مری آنکھوں میں آ بندھے

حیدر علی آتش

کیا کیا نہ رنگ تیرے طلب گار لا چکے
مستوں کو جوش صوفیوں کو حال آ چکے
ہوتی ہے تن میں روح پیامِ اجل سے شاد
دن وعدۂِ وصال کے نزدیک آ چکے

داغ دہلوی

ان کے گھر داغؔ جا کے دیکھ لیا
دل کے کہنے میں آ کے دیکھ لیا
اس نے صبح شبِ وصال مجھے
جاتے جاتے بھی آ کے دیکھ لیا
تم کو ہے وصل غیر سے انکار
اور جو ہم نے آ کے دیکھ لیا

شیخ ابراہیم ذوق

دشتِ وحشت میں بگولا تھا کہ دیوانہ ترا
روح مجنوں بہر استقبال آ کر لے گئی

مصحفی غلام ہمدانی

جو فدائے صورت خوب ہیں انہیں تب کہوں گا کہ دیکھیے
کوئی شکل اپنی ہی چشم میں کبھو سیر کرتی جو آ گئی
سو بار تم تو سامنے آ کر چلے گئے
دھوکا سا ایک ہم کو دکھا کر چلے گئے
ربط پہلے جو ترے یاد کبھی کرتا ہوں
بیٹھے بیٹھے مجھے افسوس سا آ جاتا ہے
مصحفیؔ عشق کی وادی میں گزر ہے کس کا
بھولا بھٹکا کوئی ایدھر کو بھی آ جاتا ہے

مصطفٰیٰ خان شیفتہ

گر بو الہوسی یوں تجھے باور نہیں آتی
اک مرتبہ اغیار کے قابو میں تو آ دیکھ

مومن خان مومن

اے مومنؔ آپ کب سے ہوئے بندۂِ بتاں
بارے ہمارے دین میں حضرت بھی آ گئے
اس وسعت کلام سے جی تنگ آ گیا
ناصح تو میری جان نہ لے دل گیا گیا
یہ ضعف ہے تو دم سے بھی کب تک چلا گیا
خود رفتگی کے صدمے سے مجھ کو غش آ گیا
بوسہ صنم کی آنکھ کا لیتے ہی جان دی
مومنؔ کو یاد کیا حجر الاسود آ گیا
اس کے اٹھتے ہی ہم جہاں سے اٹھے
کیا قیامت ہے دل کا آ جانا

میر مہدی مجروح

کل نشے میں تھا وہ بت مسجد میں گر آ جاتا
ایماں سے کہو یارو پھر کس سے رہا جاتا
یہ کاہشیں کیوں ہوتیں گھبرا کے اگر یہ دل
پہلو سے نکل جاتا آرام سا آ جاتا
کیا یار کی بد خوئی کیا غیر کی بد خواہی
سرمایۂِ صد آفت ہے دل ہی کا آ جانا