باقی صدیقی

کس توقع پہ آرزو کی تھی
کام آیا نہ آسرا کوئی

جگر مراد آبادی

دل کو کیا کیا سکون ہوتا ہے
جب کوئی آسرا نہیں ہوتا

عرفان صدیقی

یہ ریگِ زرد ردا ہے برہنہ سر کے لیے
اجاڑ دشت میں چادر کا آسرا کیسا

احسان دانش

رہے جو زندگی میں زندگی کا آسرا ہو کر
وہی نکلے سریر آرا قیامت میں خدا ہو کر

بہزاد لکھنوی

تمہاری بزم میں لب کھول کر ہوا خاموش
وہ بد نصیب جسے کوئی آسرا نہ ملا

بیخود بدایونی

اتنی مایوسیاں بھی کیا بیخودؔ
کیا خدا کا بھی آسرا نہ رہا

عبید اللہ علیم

شکستہ حال سا بے آسرا سا لگتا ہے
یہ شہرِ دل سے زیادہ دکھا سا لگتا ہے

حسرت موہانی

ہم بھروسے پہ ان کے بیٹھ رہے
جب کسی کا بھی آسرا نہ رہا
ہر حال میں رہا جو ترا آسرا مجھے
مایوس کر سکا نہ ہجوم بلا مجھے

سلام مچھلی شہری

جگمگا اٹھتی ہے دل میں اک مقدس روشنی
جب نہیں ہوتا کہیں بھی آسرا میرے لیے

سیماب اکبر آبادی

سلامت دامن امید سیمابؔ
محبت میں کسی کا آسرا کیا
ساری دنیا ہو ناامید تو کیا
مجھے تیرا ہی آسرا ہے ہنوز

شکیل بدایونی

ہزار قید خزاں سے چھٹ کر بہار کا آسرا کریں گے
بہار بھی ہم قفس زدوں کو نہ راس آئی تو کیا کریں گے
جلوۂ حسن کرم کا آسرا کرتا ہوں میں
جو خطا ممکن ہے مجھ سے بے خطا کرتا ہوں میں

فانی بدایونی

قبر میں جب کسی طرح دل کی تڑپ نہ کم ہوئی
یاد خرامِ ناز نے حشر کا آسرا دیا
یاس نے درد ہی نہیں حق تو یہ ہے دوا بھی دی
فانیؔ ناامید کو موت کا آسرا دیا

احمد فراز

وفا کے خواب، محبت کا آسرا لے جا
اگر چلا ہے تو جو کچھ مجھے دیا لے جا

محسن نقوی

تو آسمان کی صورت ہے گر پڑے گا کبھی
زمیں ہوں میں بھی مگر تجھ کو آسرا دوں گا