مرزا غالب

اب منتظرِ شوقِ قیامت نہیں غالب
دنیا کے ہر ذرے میں سو حشر بپا ہیں

باقی صدیقی

کان پڑتی نہیں آواز کوئی
دل میں وہ شور بپا ہے اپنا

جون ایلیا

ہاں وہ نگاہِ ناز بھی اب نہیں ماجرا طلب
ہم نے بھی اب کی فصل میں شور بپا نہیں کیا
تھا قیامت سکوت کا آشوب
حشر سا اک بپا رہا مجھ میں
ایک ملال کا سا حال محو تھا اپنے حال میں
رقص و نوا تھے بے طرف محفلِ شب بپا بھی تھی

عرفان صدیقی

رکا ہوا ہے یہ صحرا میں قافلہ کیسا
اور ایک شور سا خیموں میں ہے بپا کیسا
عارض کی دھوپ، زلف کے سائے ، بدن کی آنچ
ہنگامہ بن کے دل میں بپا ہو گئی ہے شام
خیمۂ نصرت بپا ہو گا علیؑ آنے کو ہیں
معرکوں کا فیصلہ ہو گا علیؑ آنے کو ہیں
اک روز آسماں کو بھی تھکنا ضرور ہے
کب تک زمیں پہ حشر بپا ہونے والے ہیں

بیان میرٹھی

سہو تھی وضع خاستن بستر عیش وصل سے
دیکھ کے ان کی شوخیاں فتنہ ہوا بپا کہ یوں

ضیا جالندھری

ابھی طریق تحمل نہیں مزاجوں میں
ابھی فقیہوں میں ہنگامہ ہے بپا کہ میں ہوں

عالم تاب تشنہ

دے دیے محرومیوں کے ہاتھ میں جام و سبو
میکدے میں ایک ہنگامہ بپا میں نے کیا

تلوک چند محروم

قیامت خیز ہے حسن چمن اے بلبل نالاں
ترے نالوں سے پھر محشر بپا ہونے کا وقت آیا

شکیل بدایونی

یہ بھی اے دل اک فریب وعدۂ فردا نہ ہو
روز سنتا ہوں کوئی محشر بپا ہونے کو ہے

فانی بدایونی

آغوش فنا میں ہم پروردۂ آفت ہیں
اے فتنۂ دوراں اٹھ اے حشر بپا ہو جا

قیوم نظر

چمن بندی پہ ہے محشر بپا کیا
کھلے ہیں گل اڑی ہے خاک کیا کیا
دل سے اک ہوک بھی اب اٹھتی نہیں
دل کہ ہنگامہ بپا کرتا تھا

ناصر کاظمی

سازِ ہستی کی صدا غور سے سن
کیوں ہے یہ شور بپا غور سے سن