جون ایلیا

تو بھی چپ ہے میں بھی چپ ہوں یہ کیسی تنہائی ہے
تیرے ساتھ تری یاد آئی کیا تو سچ مچ آئی ہے
اس دن پہلی بار ہوا تھا مجھ کو رفاقت کا احساس
جب اس کے ملبوس کی خوشبو گھر پہنچانے آئی ہے
آج بہت دن بعد میں اپنے کمرے تک آ نکلا تھا
جوں ہی دروازہ کھولا ہے اس کی خوشبو آئی ہے
جانے یہ تیرے وصل کے ہنگام
تیری فرقت کہاں سے آئی ہے
تو ہے آخر کہاں کہ آج مجھے
بے طرح اپنی یاد آئی ہے
موج بادِ صبا پہ ہو کے سوار
وہ شمیم خیال آئی ہے

جگر مراد آبادی

شبِ فراق ہے اور نیند آئی جاتی ہے
کچھ اس میں ان کی توجہ بھی پائی جاتی ہے
قریب منزلِ آخر ہے الفراق جگرؔ
سفر تمام ہوا نیند آئی جاتی ہے

قمر جلالوی

چارہ گر کا ہے کو لوں چارہ گری کا احساس
تو کوئی ٹالنے والا ہے مری آئی کا
خبر بھی ہے زمانہ اب سلامت رہ نہیں سکتا
جوانی تجھ پہ او ظالم قیامت بن کے آئی ہے
یہی دن تھے یہی عالم تھا بجلی ٹوٹ پڑنے کا
چمن کی خیر ہو یا رب ہنسی پھولوں کو آئی ہے
ہمارا آشیاں دیکھو بلندیِ فلک دیکھو
کہاں سے چار تنکے پھونکنے کو برق آئی ہے
اڑا لے ہم غریبوں کا مذاق آخر کو زر والے
ترے رونے پہ اے شبنم ہنسی پھولوں کو آئی ہے

عرفان صدیقی

ذہن شاعر کا، نئی صبحوں کے سورج کی کرن
جیسے سوکھے ہوئے ہونٹوں پہ ہنسی آئی ہوئی

الطاف حسین حالی

ہم نے ہر ادنیٰ کو آلا کر دیا
خاکساری اپنی کام آئی بہت
قوت دست خدائی ہے شکیبائی میں
وقت جب آ کے پڑا ہے یہی کام آئی ہے
نظر آتی نہیں اب دل میں تمنا کوئی
بعد مدت کے تمنا مری بر آئی ہے
گو جوانی میں تھی کج رائی بہت
پر جوانی ہم کو یاد آئی بہت
بات کچھ ہم سے بن نہ آئی آج
بول کر ہم نے منہ کی کھائی آج
شکوہ کرنے کی خو نہ تھی اپنی
پر طبیعت ہی کچھ بھر آئی آج
چور ہے دل میں کچھ نہ کچھ یارو
نیند پھر رات بھر نہ آئی آج

رئیس فروغؔ

خاموشی کی جھیل پہ شیاما
کنکر لے کر آئی ہے
اونچی اونچی شہنائی ہے
پاگل کو نیند آئی ہے

احسان دانش

دیکھ کر ان کے لب پہ خندۂ نور
نیند سی غم کو آئی جاتی ہے

آنس معین

ہے دیپ تری یاد کا روشن ابھی دل میں
یہ خوف ہے لیکن جو ہوا آئی ذرا اور

بشیر بدر

کرن پھول کی پتیوں میں دبی
ہنسی اس کے ہونٹوں پہ آئی ہوئی
اس جان تغزل نے جب بھی کہا کچھ کہئے
میں بھول گیا اکثر یاد آئی ہوئی غزلیں

زہرا نگاہ

جو دل نے کہی لب پہ کہاں آئی ہے دیکھو
اب محفل یاراں میں بھی تنہائی ہے دیکھو

حسرت موہانی

حائل تھی بیچ میں جو رضائی تمام شب
اس غم سے ہم کو نیند نہ آئی تمام شب

حفیظ جالندھری

موت کے چہرے پہ ہے کیوں مردنی چھائی ہوئی
دیکھنا کون آ گیا کیوں ٹل گئی آئی ہوئی
عشق کے ہاتھوں یہ ساری عالم آرائی ہوئی
عشق کے ہاتھوں قیامت بھی ہے اب آئی ہوئی

سید ضمیر جعفری

درد میں لذت بہت اشکوں میں رعنائی بہت
اے غمِ ہستی ہمیں دنیا پسند آئی بہت
مصلحت کا جبر ایسا تھا کہ چپ رہنا پڑا
ورنہ اسلوب زمانہ پر ہنسی آئی بہت
بے خیالی میں بھی کتنے فاصلے طے ہو گئے
بے ارادہ بھی یہ دنیا دور لے آئی بہت

سیف الدین سیف

سینے میں اک درد بھی رہتا ہے بیدار
آنکھوں میں کچھ نیند بھی آئی رہتی ہے

شکیل بدایونی

ان سے امید رو نمائی ہے
کیا نگاہوں کی موت آئی ہے
وہ ہوا دے رہے ہیں دامن کی
ہائے کس وقت نیند آئی ہے
شمع پروانہ ہوں کہ غنچہ و گل
زندگی کس کو راس آئی ہے
گل فسردہ چمن اداس شکیلؔ
یوں بھی اکثر بہار آئی ہے
بھلا دیا ہے غمِ روزگار نے جس کو
وہ داستاں مجھے پھر یاد آئی جاتی ہے
شکیلؔ دوریِ منزل سے ناامید نہ ہو
اب آئی جاتی ہے منزل اب آئی جاتی ہے

فانی بدایونی

تیری مرضی جو دیکھ پائی ہے
خلشِ درد کی بن آئی ہے
موت آتی ہے تم نہ آؤگے
تم نہ آئے تو موت آئی ہے
ترک امید بس کی بات نہیں
ورنہ امید کب بر آئی ہے
آنکھ اٹھائی ہی تھی کہ کھائی چوٹ
بچ گئی آنکھ دل پہ آئی چوٹ

اختر ہوشیارپوری

میں سر دشت جاں تھا آوارہ
اور گھر میں بہار آئی تھی
زندگی گرد گرد تھی اخترؔ
جانے لٹ کر کہاں سے آئی تھی

احمد فراز

تو غنی ہے مگر اتنی ہیں شرائط تیری
وہ محبت جو ہمیں راس نہ آئی لے لے

شاذ تمکنت

جام خوش رنگ تہی ہے مجھے معلوم نہ تھا
اپنی ٹوٹی ہوئی توبہ پہ ہنسی آئی ہے
شاذؔ پوچھو کہ یہ آنکھوں کا دھندلکا کب تک
رات آئی نہیں یا نیند نہیں آئی ہے

کلیم عاجز

بدلی سی اپنی آنکھوں میں چھائی ہوئی سی ہے
بھولی ہوئی سی یاد پھر آئی ہوئی سی ہے
چھیڑی غزل جو تم نے تو ایسا لگا کلیمؔ
خوشبو کسی کی زلف کی آئی ہوئی سی ہے

محسن احسان

چار جانب سے صدا آئی مری
شعبدہ بن گئی تنہائی مری
صبح چمکی تو غبارِ شب سے
بے محابانہ صدا آئی مری
عمر بھر میرا مخاطب وہ تھا
بات جس کو نہ سمجھ آئی مری

میرا جی

صبح سویرے کون سی صورت پھلواری میں آئی ہے
ڈالی ڈالی جھوم اٹھی ہے کلی کلی لہرائی ہے

ناصر کاظمی

دیکھتے دیکھتے تاروں کا سفر ختم ہوا
سو گیا چاند مگر نیند نہ آئی مجھ کو
سائے کی طرح مرے ساتھ رہے رنج و الم
گردشِ وقت کہیں راس نہ آئی مجھ کو
ایک دم اس کا ہاتھ چھوڑ دیا
جانے کیا بات درمیاں آئی
کوئی جھونکا چلا تو دل دھڑکا
دل دھڑکتے ہی تیری یاد آئی

نوح ناروی

مجھے گلشن سے اے جوش جنوں صحرا کو اب لے چل
یہاں اس کے سوا کیا ہے خزاں آئی بہار آئی