مرزا غالب

ہم موحد ہیں ہمارا کیش ہے ترکِ رسوم
ملتیں جب مٹ گئیں اجزائے ایماں ہو گئیں

مصطفٰیٰ خان شیفتہ

تکبر گدائے خرابات ہے
نہ اے خواجہ کھو جان و ایماں عبث

مومن خان مومن

مومنؔ یہ لاف الفت تقویٰ ہے کیوں مگر
دلی میں کوئی دشمن ایماں نہیں رہا

یگانہ چنگیزی

چشمِ پر فن نے زمانے پہ کیا وہ جادو
ہوش ہے دیں کا کسی کو نہ ہے ایماں کی خبر

باقی صدیقی

باقیؔ اسی میں حضرت انساں کی خیر ہے
سارا جہان دے کے اک ایماں خریدیے

مصطفیٰ زیدی

کف مومن سے نہ دروازۂ دوراں سے ملا
رشتۂ درد اسی دشمن ایماں سے ملا

اختر شیرانی

کس کے در پر نہ کیے سجدے نگاہوں نے مگر
ہائے تقدیر وہ غارت گرِ ایماں نہ ملا

بہزاد لکھنوی

اک بے وفا کو درد کا درماں بنا لیا
ہم نے تو آہ کفر کو ایماں بنا لیا
دل میرا تیرا تابع فرماں ہے کیا کروں
اب تیرا کفر ہی مرا ایماں ہے کیا کروں
ہر سمت پا رہا ہوں وہی رنگِ دل فریب
ہاتھوں میں کفر کے مرا ایماں ہے کیا کروں
اک بے وفا کے واسطے سے سب کچھ لٹا دیا
بہزادؔ اب نہ دین نہ ایماں ہے کیا کروں

تلوک چند محروم

کچھ بری بات نہیں صاحب ایماں ہونا
اگر ایمان سے مطلوب ہو انساں ہونا

شاد عظیم آبادی

کعبہ و دیر میں جلوہ نہیں یکساں ان کا
جو یہ کہتے ہیں ٹٹولے کوئی ایماں ان کا
وہم تو ہی خلل انداز ہوا ہے ورنہ
کون جویا نہیں اے رہزن ایماں ان کا

فراق گورکھپوری

دم لے رہی تھیں حسن کی جب سحر‌ کاریاں
ان وقفہ‌ ہائے کفر کو ایماں بنا دیا
کبھی تنگ آ کے اس کے حسن سے انکار بھی کر لے
کوئی بے کفر کے شائستۂ ایماں نہیں ہوتا

مجروح سلطان پوری

ہم تو پائے جاں پر کر بھی آئے اک سجدہ
سوچتی رہی دنیا کفر ہے کہ ایماں ہے