مرزا غالب

قفس میں مجھ سے رودادِ چمن کہتے نہ ڈر ہمدم
گری ہے جس پہ کل بجلی وہ میرا آشیاں کیوں ہو
مثال یہ مری کوشش کی ہے کہ مرغِ اسیر
کرے قفس میں فراہم خس آشیاں کے لیے

حیدر علی آتش

دل میں خیال گیسوئے مشکیں ہے بد بلا
یہ مرغ روح کے لیے سانپ آشیاں میں ہے
برنگ بو ہوں گلشن میں میں بلبل
بغل غنچے کے میرا آشیاں ہے
باغ جہاں کو یاد کریں گے عدم میں کیا
کنجِ قفس سے تنگ رہے آشیاں میں ہم
چمن میں رہنے دے کون آشیاں نہیں معلوم
نہال کس کو کرے باغباں نہیں معلوم
کھلی ہے خانۂِ صیاد میں ہماری آنکھ
قفس کو جانتے ہیں آشیاں نہیں معلوم

داغ دہلوی

چھڑا دے قید سے اے برق ہم اسیروں کو
لگا دے آگ قفس کو بھی آشیاں کی طرح
شکستہ بال ہوں وہ مرغ ناتواں و ضعیف
کہ میں تو میں نہ اڑے میرے آشیاں کی طرح

شیخ ابراہیم ذوق

کہے ہے مرغِ دل اے کاش میں زاغ کماں ہوتا
کہ تا شاخ کماں پر اس کی میرا آشیاں ہوتا

مصحفی غلام ہمدانی

باغ تھا اس میں آشیاں بھی تھا
چند روز آب و دانہ یاں بھی تھا
باغباں اب چمن سے جاویں کہاں
بلبل کہنہ آشیاں ہیں ہم
گل کا یہ رنگ ہے تو اب اک دن
آگ رکھ دیں گے آشیاں میں ہم
ہیں کنجِ قفس کے رہنے والے
پروردۂِ آشیاں نہیں ہم
ٹک اے باغباں رحم کر بلبلوں پر
خزاں میں یہ بے آشیاں ہو گئی ہیں
اپنی تو اس چمن میں نت عمر یوں ہی گزری
یاں آشیاں بنایا واں آشیاں بنایا
ہم چھوٹ کے جب قفس سے آئے
دیکھا نہ چمن میں آشیاں ایک
وہیں تھے شاخِ گل پر گل جہاں جمع
کیے بلبل نے خار آشیاں جمع
برق گلشن میں پڑی کس کے تبسم سے صبا
جو نہ جھلسا ہووے ایسا آشیاں کوئی نہیں

مصطفٰیٰ خان شیفتہ

قفس زمانہ و جاں مرغ و آشیاں ملکوت
قفس میں مرغ ہے بیتاب آشیاں کے لیے
اے تابِ برق تھوڑی سی تکلیف اور بھی
کچھ رہ گئے ہیں خار و خس آشیاں ہنوز

میر مہدی مجروح

قفس صیاد کا خالی پڑا ہے
نہ ہوں بے چین کیوں کر آشیاں میں
مدد اے نغمہ‌ سنجی بلبل
کب سے گم کردہ آشیاں ہوں میں
کیا نہیں یاد برق کا گرنا
پھر بناتا جو آشیاں ہوں میں