مصطفیٰ زیدی

اک موجِ خون خلق تھی کس کی جبیں پہ تھی
اک طوق فردِ جرم تھا کس کے گلے میں تھا

رئیس فروغؔ

مجھ سے مری رات بھی خفا ہے
مجھ سے مرے دن کو بھی گلے ہیں

احسان دانش

آنسوؤں میں نہا گئیں خوشیاں
روٹھ کر جب وہ آ لگے ہیں گلے
مے کدے کا تو ذکر بھی ہے گناہ
اب حیات حرم پڑی ہے گلے

فارغ بخاری

کتنے شکوے گلے ہیں پہلے ہی
راہ میں فاصلے ہیں پہلے ہی

سیف الدین سیف

سنتا نہیں کوئی سیفؔ ورنہ
کہنے کو تو سینکڑوں گلے ہیں

عزیز حامد مدنی

جو رگِ ابر و باد سے تا بہ رگ جنوں رہیں
عشق کی وہ حکایتیں حسن کے وہ گلے گئے

اختر ہوشیارپوری

مانا کسی کا درد غم زندگی نہیں
پھر بھی کسی کے درد سے کیا کیا گلے ہوئے

قابل اجمیری

لب پہ ہچکی بھی ہے تبسم بھی
جانے ہم کس سے مل رہے ہیں گلے
مصلحت سرنگوں خرد خاموش
عشق کے آگے کس کی دال گلے

ناصر کاظمی

تمھیں دل گرفتہ نہیں دوستو
ہمیں بھی زمانے سے ہیں کچھ گلے