مرزا غالب

انہیں منظور اپنے زخمیوں کا دیکھ آنا تھا
اٹھے تھے سیرِ گل کو، دیکھنا شوخی بہانے کی

یگانہ چنگیزی

دیوانے بن کے ان کے گلے سے لپٹ بھی جاؤ
کام اپنا کر لو یاسؔ بہانے بہانے میں

باقی صدیقی

یہی رستہ ہے اب یہی منزل
اب یہیں دل کسی بہانے لگے

عبدالحمید عدم

وہ باتیں تری وہ فسانے ترے
شگفتہ شگفتہ بہانے ترے

قمر جلالوی

ان کے حسن پر تہمت رکھ نہ اپنے مرنے کی
وہ تو موت آنے تھی اک نہ اک بہانے سے

اختر شیرانی

وہ ہجر میں وصال کی امید کیا ہوئی
وہ رنج میں خوشی کے بہانے کدھر گئے

ادا جعفری

کھل کے ہنسنا تو سب کو آتا ہے
لوگ ترسے ہیں اک بہانے کو

بیان میرٹھی

خوں بہانے کے ہیں ہزار طریق
رنگ لانے کے ہیں ہزار طریق

غلام محمد قاصر

ہم نے تو بے شمار بہانے بنائے ہیں
کہتا ہے دل کہ بت بھی خدا نے بنائے ہیں

سیف الدین سیف

مجبوری سب کو ہوتی ہے
ملنا ہو تو لاکھ بہانے
دنیا بھر کا درد سہا ہے
ہم نے تیرے غم کے بہانے
سیفؔ وہ غم بھی تشنۂ خوں ہے
ہم زندہ ہیں جس کے بہانے
تری نظر سے زمانے بدلتے رہتے ہیں
یہ لوگ تیرے بہانے بدلتے رہتے ہیں

شاد عظیم آبادی

خواب تک میں بھی نظر آتا نہیں اے چشم
میرے رو دینے پہ اشکوں کا بہانے والا

شکیل بدایونی

غمِ جہاں کے فسانے تلاش کرتے ہیں
یہ فتنہ گر تو بہانے تلاش کرتے ہیں

احمد فراز

قربتوں میں بھی جدائی کے زمانے مانگے
دل وہ بے مہر کہ رونے کے بہانے مانگے
یہی دل تھا کہ ترستا تھا مراسم کے لیے
اب یہی ترکِ تعلق کے بہانے مانگے
ربط کے سینکڑوں حیلے ہیں محبت نہ سہی
ہم ترے ساتھ کسی اور بہانے لگ جائیں

شاذ تمکنت

ضبط پیہم کے نثار اے دل آزار طلب
شرط‌‌ دامن بھی اٹھا اشک بہانے کے لیے
یوں بھی وہ دل ہو کہ درہم پہ کھلا رہتا ہے
اپنی اک وضع جنوں تھی کہ بہانے سے گئے

فراق گورکھپوری

وہ چپ چاپ آنسو بہانے کی راتیں
وہ اک شخص کے یاد آنے کی راتیں

کیف بھوپالی

کبھی لکھوانے گئے خط کبھی پڑھوانے گئے
ہم حسینوں سے اسی حیلے بہانے سے ملے

مجروح سلطان پوری

آ نکل کے میداں میں دو رخی کے خانے سے
کام چل نہیں سکتا اب کسی بہانے سے