رئیس فروغؔ

اب تک جو مجھے نہیں ملے ہیں
وہ پھول مرے لیے کھلے ہیں

فارغ بخاری

اور لے جائے گا کہاں گلچیں
سارے مقتل کھلے ہیں پہلے ہی

سیف الدین سیف

گزرے تھے نہ چشم باغباں سے
جو اب کی بہارِ گل کھلے ہیں

شان الحق حقی

غم بردہ سہی غنچۂ افسردہ سہی دل
تم پیار سے دیکھو تو کھلے بن نہ رہا جائے

اختر ہوشیارپوری

شاخوں پہ زخم ہیں کہ شگوفے کھلے ہوئے
اب کے فروغ گل کے عجب سلسلے ہوئے
اپنا ہی دھیان اور کہیں تھا نظر کہیں
ورنہ تھے راہ میں گل‌ و غنچے کھلے ہوئے

اکبر حمیدی

مہک رہی ہے فضا اس بدن کی خوشبو سے
چمن ہرا بھرا ہے پھول بھی کھلے ہوئے ہیں

ناصر کاظمی

نہ آنکھیں ہی برسیں نہ تم ہی ملے
بہاروں میں اب کی نئے گل کھلے
ہمیں بھی کریں یاد اہلِ چمن
چمن میں اگر کوئی غنچہ کھلے