مرزا غالب

رنج طاقت سے سوا ہو تو نہ پیٹوں کیوں سر
ذہن میں خوبی تسلیم و رضا ہے تو سہی

مصطفٰیٰ خان شیفتہ

ہاں شیفتہ پھر اس میں نصیحت ہی کیوں نہ ہو
سنتے ہیں حرفِ تلخ کو سمعِ رضا سے ہم

فیض احمد فیض

جہانِ دل میں کام آتی ہیں تدبیریں نہ تعزیریں
یہاں پیمانِ تسلیم و رضا ایسے نہیں ہوتا

باقی صدیقی

دل تری بزم میں لے آتا ہے
ہم تو واقف ہیں رضا سے تیری

عبدالحمید عدم

کتنی بے ساختہ خطا ہوں میں
آپ کی رغبت و رضا ہوں میں
شوقیہ کوئی نہیں ہوتا غلط
اس میں کچھ تیری رضا موجود ہے

عرفان صدیقی

گریہ نشان جاں ہے مگر اس کے باوجود
مقتل مقام صبر و رضا ہے رضا کریں
یہ چشمِ کم نظر تہہ خنجر کہے جسے
کچھ بھی گلوئے صبر و رضا کے سوا نہ تھا
چشمۂ خوں سے بجھاکر لشکرِ اعدا کی پیاس
بادشاہ کشور صبر و رضا مارا گیا
وہ شعلہ اپنی ہی تیزی میں جل بجھا ورنہ
رکھا تھا خیمۂ صبر و رضا نشانے پر
ہوائے کوفۂ نا مہرباں کو حیرت ہے
کہ لوگ خیمۂ صبر و رضا میں زندہ ہیں
حق ان کے ساتھ حق کی رضا ان کے ساتھ ہے
تنہا نہیں ہیں وہ کہ خدا ان کے ساتھ ہے

مجید امجد

سلام ان پہ، تہہ تیغ بھی جنہوں نے کہا
جو تیرا حکم، جو تیری رضا، جو تو چاہے

حسرت موہانی

ہر بات میں انہیں کی خوشی کا رہا خیال
ہر کام سے غرض ہے انہیں کی رضا مجھے
دعا میں ذکر کیوں ہو مدعا کا
کہ یہ شیوہ نہیں اہل رضا کا
پیرو مسلک تسلیم و رضا ہوتے ہیں
ہم تیری راہِ محبت میں فنا ہوتے ہیں

حفیظ جالندھری

کوئی راضی نہ رہ سکا مجھ سے
میرے اللہ تری رضا کے سوا
نہ پوچھو حال میرا کچھ نہ پوچھو
کہ تسلیم و رضا ہے اور میں ہوں
دست تقدیر میں شمشیر جفا دینا ہے
خود بہ خود بندۂ تسلیم و رضا ہو جانا
وہ اپنی جفاؤں کا اثر دیکھ رہے ہیں
میں معنی تسلیم و رضا دیکھ رہا ہوں

سیف الدین سیف

لوٹ آئے ہم تو عرض دعا کے مقام سے
ہر شے تھی پست ان کی رضا کے مقام سے

فانی بدایونی

اے شوق طلب بڑھ کر مجنون ادا ہو جا
اے ہمت مردانہ راضی بہ رضا ہو جا
تسلیم کی نظر سے کرشمے رضا کے دیکھ
بیگانگی دوست کو اپنا بنا کے دیکھ

قتیل شفائی

بہ فیض گردشِ دوراں انہیں بھی پیار آیا
بہ پاس مصلحت ان کی رضا بھی خوب رہی