مرزا غالب

خموشی میں نہاں ، خوں گشتہ لاکھوں آرزوئیں ہیں
چراغِ مردہ ہوں ، میں بے زباں ، گورِ غریباں کا

مصحفی غلام ہمدانی

دل خوش نہ ہوا زلفِ پریشاں سے نکل کر
پچھتائے ہم اس شامِ غریباں سے نکل کر

یگانہ چنگیزی

دل جلا کر وادیِ غربت کو روشن کر چلے
خوب سوجھی جلوۂ شامِ غریباں دیکھ کر
گلشنِ دہر میں راحت بھی ہے اور رنج بھی ہے
دیتی ہے صبحِ وطن شامِ غریباں کی خبر

مصطفیٰ زیدی

سحر جیتے گی یا شامِ غریباں دیکھتے رہنا
یہ سر جھکتے ہیں یا دیوارِ زنداں دیکھتے رہنا

اختر شیرانی

آج تک صبحِ وطن یاد ہے ہم کو اخترؔ
درد ہجراں کی قسم شامِ غریباں کی قسم

جوش ملیح آبادی

نسیم صبح ٹھنڈی سانس بھرتی ہے مزاروں پر
اداسی منہ اندھیرے دیکھیے گور غریباں کی

حفیظ جالندھری

اس مشقت گاہ میں راحت کا یہ گوشہ حفیظؔ
دیکھ لو اور خوش رہو گورِ غریباں دیکھ کر

سیماب اکبر آبادی

سیمابؔ کبر و ناز کا انجام کچھ نہ پوچھ
سب رفتہ رفتہ گورِ غریباں میں آ گئے

شاد عظیم آبادی

چھوڑ کر آئے ہیں جو صبحِ وطن سی شے کو
مرتبہ کچھ تو سمجھ شامِ غریباں ان کا

ناصر کاظمی

کیا بگڑ جائے گا اے صبحِ جمال
آج اگر شامِ غریباں چمکے