مرزا غالب

وہ بد خو ، اور میری داستانِ عشق طولانی
عبارت مختصر ، قاصد بھی گھبرا جائے ہے مجھ سے
شوقِ کو یہ لت کہ ہر دم نالہ کھینچے جائیے
دل کی وہ حالت کہ دم لینے سے گھبرا جائے ہے

مصحفی غلام ہمدانی

ہم تو اس کوچے میں گھبرا کے چلے آتے ہیں
دو قدم جاتے ہیں پھر جا کے چلے آتے ہیں

جون ایلیا

تری بانہوں سے ہجرت کرنے والے
نئے ماحول میں گھبرا رہے ہیں

خواجہ میر درد

سینہ و دل حسرتوں سے چھا گیا
بس ہجومِ یاس جی گھبرا گیا

احسان دانش

توبہ کی نازشوں پہ ستم ڈھا کے پی گیا
''پی''! اس نے جب کہا تو میں گھبرا کے پی گیا

زہرا نگاہ

بیٹھے بیٹھے کیسا دل گھبرا جاتا ہے
جانے والوں کا جانا یاد آ جاتا ہے

جوش ملیح آبادی

نظر ہو خواہ کتنی ہی حقائق آشنا پھر بھی
ہجوم کشمکش میں آدمی گھبرا ہی جاتا ہے

حفیظ جالندھری

کر دیا ہے تم نے دل کو مطمئن
دیکھ لینا سخت گھبرا جائے گا

شکیل بدایونی

رنگینی مستقبل روشن ہے نظر میں
ہم تلخی ماحول سے گھبرا نہیں سکتے
عشق سے گھبرا رہی ہے ان کی یاد
رکتے رکتے آ رہی ہے ان کی یاد
منزل سے دور رہرو منزل تھا مطمئن
منزل قریب آئی تو گھبرا کے رہ گیا

احمد فراز

جہاں کے شور سے گھبرا گئے کیا
مسافر گھر کو واپس آ گئے کیا؟

فراق گورکھپوری

ستاروں سے الجھتا جا رہا ہوں
شبِ فرقت بہت گھبرا رہا ہوں

قتیل شفائی

چمن والے خزاں کے نام سے گھبرا نہیں سکتے
کچھ ایسے پھول بھی کھلتے ہیں جو مرجھا نہیں سکتے

ناصر کاظمی

ترے شہرِ طرب کی رونقوں میں
طبیعت اور بھی گھبرا رہی ہے