مرزا غالب

خوشا اقبالِ رنجوری ! عیادت کو تم آئے ہو
فروغِ شمع بالیں ، طالعِ بیدار بستر ہے

امام بخش ناسخ

گھر بھی میرا منتظر ہے یار کا میری طرح
روزنِ در میں ہے صورت دیدۂِ بیدار کی
کہتے ہو ہم خواب میں آتے جو تو سوتا کبھی
خوب کی برباد محنت دیدۂِ بیدار کی

حیدر علی آتش

یاد میں تیری رقیب رو سیہ جاگا تو کیا
مرتبہ عالی نہ ہو خفاش شب بیدار کا
وہ مست خواب چشم ہے کوئی بلائے بد
کیا مرتبہ ہے فتنۂِ بیدار کے لیے

مصحفی غلام ہمدانی

کوٹھے پہ اس کے پھینکوں میں کس راہ سے کمند
کم بخت پاسباں تو ہیں بیدار ہر طرف

مومن خان مومن

تھی خار راہ تیری مژگاں کی یاد پھر شب
تا صبح خواب چشمِ بیدار تک نہ پہنچا

باقی صدیقی

لوریاں دیتی رہی دنیا بہت
پھر بھی جو بیدار تھا، بیدار ہے
دل ڈوب گیا لذت آغوش سحر میں
بیدار ہے اس طرح کہ بیدار نہیں ہے

جون ایلیا

آؤ اے خفتہ نصیبو مفلسو
دولتِ بیدار کی باتیں کریں

جگر مراد آبادی

ہر اک بے کار سی ہستی بروئے کار ہو جائے
جنوں کی روح خوابیدہ اگر بیدار ہو جائے
یہ روز و شب یہ صبح و شام یہ بستی یہ ویرانہ
سبھی بیدار ہیں انساں اگر بیدار ہو جائے
سینے میں اگر ہو دلِ بیدار محبت
ہر سانس ہے پیغمبر اسرار محبت

شکیب جلالی

کتنے طوفان اٹھے ‘ کتنے ستارے ٹوٹے
پھر بھی ڈوبا نہیں اب تک دلِ بیدار یہاں

عرفان صدیقی

شہر کیوں رات میں بیدار ہے میں کیا جانوں
جشن ہے صبح کہ پیکار ہے میں کیا جانوں
عجیب نشہ ہے ہشیار رہنا چاہتا ہوں
میں اس کے خواب میں بیدار رہنا چاہتا ہوں
ذہن ہو تنگ تو پھر شوخی افکار نہ رکھ
بند تہہ خانوں میں یہ دولتِ بیدار نہ رکھ
ہو صبح کہ سر دینے پہ تیار ہیں ہم بھی
خیموں میں بہت دیر سے بیدار ہیں ہم بھی
حرف میں جاگتی جاتی ہے مرے دل کی مراد
دھیرے دھیرے مجھے بیدار کیا ہے اس نے

احسان دانش

دے دے کے نگاہوں کو تصور کا سہارا
راتوں کو ترے واسطے بیدار ہمیں تھے

اختر شیرانی

اخترؔ اس رنگیں ادا سے رات بھر
طالعِ بیدار کی باتیں کریں

ادا جعفری

توفیق سے کب کوئی سروکار چلے ہے
دنیا میں فقط طالعِ بیدار چلے ہے

ظہیر کاشمیری

امید وصل یار میں شب کاٹ دی تو کیا
دن ڈھل گیا تو نیند سے بیدار کیا ہوئے

جوش ملیح آبادی

بے ہوشیوں نے اور خبردار کر دیا
سوئی جو عقل روح نے بیدار کر دیا
گداز دل سے باطن کا تجلی زار ہو جانا
محبت اصل میں ہے روح کا بیدار ہو جانا
سحر کا اس طرح انگڑائی لینا دل فریبی سے
ادھر شاعر کے محسوسات کا بیدار ہو جانا
بخت خوابیدہ گیا ظلمت شب کے ہم راہ
صبح کا نور لیے دولت بیدار آیا

سیماب اکبر آبادی

دل تیرے تغافل سے خبردار نہ ہو جائے
یہ فتنہ کہیں خواب سے بیدار نہ ہو جائے
جو ظلمت میں بھی تنویر حقیقت دیکھنا چاہے
وہ میری طرح پچھلی رات سے بیدار ہو جائے

شبلی نعمانی

فتنۂ حشر جو آنا تو دبے پاؤں ذرا
بختِ خفتہ مرا بیدار نہ ہونے پائے

شکیل بدایونی

عالم فرقت میں ذکر خواب کیا
نیند خود بیدار ہے تیرے بغیر
نگاہِ ناز کا اک وار کر کے چھوڑ دیا
دل حریف کو بیدار کر کے چھوڑ دیا

افضل منہاس

ویسے تمام عمر مری نیند میں کٹی
گھر میں نقب لگی تو میں بیدار ہو گیا

شاذ تمکنت

دکھائی دے تو وہ بس خواب میں دکھائی دے
مرا یہ حال کہ میں مدتوں سے ہوں بیدار

قتیل شفائی

جو وصف ہم میں نہیں کیوں کریں کسی میں تلاش
اگر ضمیر ہے بیدار آؤ سچ بولیں
جاگ اٹھے تو آہیں بھریں گے حسن والوں کو رسوا کریں گے
سو گئے ہیں جو فرقت کے مارے ان کو بیدار کرنا منع ہے

محبوب خزاں

خلوص ناز کی توہین بھی دیکھی نہیں جاتی
شعور حسن کو بیدار بھی کرتے نہیں بنتا

مجروح سلطان پوری

اس کوئے تشنگی میں بہت ہے کہ ایک جام
ہاتھ آ گیا ہے دولتِ بیدار کی طرح
مجروحؔ کے لبوں سے یہ خوشبو نہ جا سکی
بخشی جو اس نے دولتِ بیدار دیکھیے

نوح ناروی

ملنے سے تنفر تھا جس کو آغوش میں اب وہ سوتا ہے
تقدیر مری اقبال مرا بیدار ہوئی بیدار ہوا