مرزا غالب

واں کنگرِ استغنا ہر دم ہے بلندی پر
یاں نالے کو اور الٹا دعوائے رسائی ہے

بہادر شاہ ظفر

واں رسائی نہیں تو پھر کیا ہے
یہ جدائی نہیں تو پھر کیا ہے

حیدر علی آتش

وصالِ یار کا وعدہ ہے فردائے قیامت پر
یقیں مجھ کو نہیں ہے گور تک اپنی رسائی کا

داغ دہلوی

میں یہاں ہوں وہاں ہے دل میرا
نارسائی عجب رسائی ہے
اس کے در تک کسے رسائی ہے
وہ ہی جائے گا جس کی آئی ہے
اس کے در تک پہنچ گیا قاصد
آگے تقدیر کی رسائی ہے

مصحفی غلام ہمدانی

یہی درباں پہ ہے قدغن تو یارو
صبا کی واں رسائی ہو چکی بس

مصطفٰیٰ خان شیفتہ

ایک دن تیرے گھر میں آنا ہے
بخت و طالع نے گر رسائی کی

قمر جلالوی

بھلا اپنے نالوں کی مجھ کو کیا خبر کیا شبِ غم ہوئی تھی کہاں تک رسائی
مگر یہ عدو کی زبانی سنا ہے بڑی مشکلوں سے تمہیں نیند آئی

عبید اللہ علیم

جو ایک خواب کا نشہ ہو کم تو آنکھوں کو
ہزار خواب دے اور جرأت رسائی دے

عزیز حامد مدنی

الگ سیاستِ درباں سے دل میں ہے اک بات
یہ وقت میری رسائی کا وقت ہے کہ نہیں

اقبال ساجد

آئینہ ہاتھ میں ہے تو سورج پہ عکس ڈال
کچھ لطف بھی سراغ رسائی میں آئے گا