مرزا غالب

خود جاں دے کے روح کو آزاد کیجیے
تاکے خیالِ خاطرِ جلاد کیجیے

بہادر شاہ ظفر

کیا گنہ کیا جرم کیا تقصیر میری کیا خطا
بن گیا جو اس طرح حق میں مرے جلاد تو

داغ دہلوی

عید ہے قتل مرا اہل تماشا کے لیے
سب گلے ملنے لگے جب کہ وہ جلاد آیا
میں تمنائے شہادت کا مزا بھول گیا
آج اس شوق سے ارمان سے جلاد آیا
یہ سخت جاں تو قتل سے ناشاد رہ گیا
خنجر چلا تو بازوئے جلاد رہ گیا

مصطفٰیٰ خان شیفتہ

یاں امید قتل ہی نے خوں کیا
رہ گئی حسرتِ دل جلاد میں

مومن خان مومن

گر بہائے خون عاشق ہے وصال
انتقام زحمت جلاد کیا
تھے بے گناہ جرأت پا بوس تھی ضرور
کیا کرتے وہم خجلت جلاد آ گیا

مرزا رفیع سودا

ثابت نہ ہووے خون مرا روز باز پرس
بولیں گے اہل حشر سو جلاد کی طرف
یاں تک مرے مشہد سے ہے تشنہ لبی پیدا
اس سمت جو ہو گزرا جلاد بہت رویا

جون ایلیا

ہم نے دل کو مار رکھا ہے اور جتاتے پھرتے ہیں
ہم دل زخمی مژگاں خونیں ہم نہ ہوئے جلاد ہوئے

جگر مراد آبادی

منصور تو سر دے کے سبک ہو گیا لیکن
جلاد سے پوچھے کوئی جلاد کا عالم

قمر جلالوی

دور بیٹھا ہوں ثبوتِ خون چھپائے حشر میں
پاس اتنا ہے کہ رسوائی نہ ہو جلاد کی
مجھ سے روٹھا ہے خودی دیکھو بتِ جلاد کی
مدعا یہ ہے کہ کیوں اللہ سے فریاد کی